Lugo acolleu a oitava edición dos galardóns, que premiaron, entre outros, aos lucenses José Tomei, José Manuel Carballo e Héctor Castiñeira
29 novs 2021 . Actualizado ás 23:25 h.O salón rexio do Círculo dás Artes acolleu este domingo a entrega dos oitavos premios da Confederación Galega de Asociacións Veciñais Rosalía de Castro, Cogave. Os galardóns, baixo o nome «Crer no movemento veciñal», recoñeceron o labor dunha ducia de persoas e colectivos cuxa achega social é relevante.
«Estes son uns premios de sentimento, e máis nesta edición, cando se cumpren 50 anos dos primeiros movementos veciñais. As primeiras asociacións das cidades legalizáronse no ano 1971, e dende entón a solidariedade define o noso traballo», sinalou Jesús Vázquez, presidente da federación lucense, ao comezo do acto. E é que onte os asistentes puxeron, sobre todo, emoción aos galardóns, pero sen esquecerse de que a pelexa é parte da tarefa diaria dos colectivos. «Tentamos loitar polos problemas de Galicia dende Cogave, e todas as asociacións temos algo importante polo que loitar», subliñou Fernando Rois, presidente da confederación.
Cada federación integrante de Cogave designou a dous premiados, e a maiores o colectivo elixiu a outras dúas persoas a nivel autonómico. A federación lucense recoñeceu a achega do presidente da Deputación de Lugo, José Tomei Roca, e de José Manuel Carballo, coordinador de varias plataformas dentro do movemento veciñal lucense.
A federación veciñal ourensá, Limiar, recoñeceu ao Colexio de Enfermería de Ourense e ao servizo de voluntariado de Protección Civil.
O colectivo ferrolán premiou a José Antonio Méndez García, referente asociativo na cidade, e a Suso Basterrechea, recoñecido artista, profesor e político.
Castelao, a federación pontevedresa, quixo galardoar á Asociación Española Contra o Cancro en Pontevedra e ao cociñeiro Pepe Solla, cuxo galardón foi recollido pola súa nai.
A Federación de Asociacións Veciñais da Coruña e Metropolitana nomeou á educadora Alicia Tojeiro Ríos e ao proxecto Enki, da Fundación Abrente, que loita pola integración das persoas con diversidade funcional a través do deporte.
Recoñecementos autonómicos
A emprendedora e voluntaria Diana Piñeiro e o colectivo Os Ninguéns, que traballan para garantir as necesidades básicas a persoas en exclusión, foron os nomeados da federación Eduardo Chao, de Vigo.
A nivel autonómico, a Cogave premiou a José Antonio Paredes, presidente da federación de Cangas e destacado membro de plataformas como a que pelexou pola supresión da peaxe de Rande, e ao lucense Héctor Castiñeira, cuxo alter ego, Enfermeira Saturada, deulle notable recoñecemento. O enfermeiro é un firme defensor da divulgación sanitaria e co seu premio a confederación quixo recoñecer o papel que todo o persoal sanitario tivo durante a pandemia.