O concelleiro de Lugo Javier Vázquez será o número tres
19 sep 2021 . Actualizado ás 05:00 h.Nerviosismo dentro das filas do PP de Lugo durante toda a xornada do sábadou na que se agardaba coñecer de xeito oficial o equipo que acompañará a Elena Candia na dirección do partido e que será referendado no congreso deste domingo, en Outeiro de Rei.
O secretario xeral do PPdeG en Lugo, o número dous de Elena Candia, será José Manuel Balseiro, actual parlamentario e exdelegado da Xunta en Lugo. Desta forma volve retomar protagonismo político a figura de Balseiro. Sucederá no cargo o que foi man dereita de Candia na Deputación, Juan Carlos Armestro, actual alcalde do Saviñao.
Pola súa banda, o número tres do partido en Lugo será o concelleiro e profesor de Lugo Javier Vázquez, que ocupará a secretaría de organización. Tamén podería ocupar un cargo na executiva a concelleira Cristina Abades.
Durante toda a xornada do sábado houbo chamadas para perfilar a executiva e a xunta directiva que se elixa este domingo, nun congreso ao que acudirá Alberto Núñez Feijoo e a vicesecretaria de organización do PP, Ana Beltrán.
Un nome que se barallou nos últimos días para participar na executiva foi o do alcalde de Friol , José Anxo Santos, pero o rexedor, un dos máis votados de Galicia, rexeitou participar para centrarse máis no seu municipio.
Tamén estivo no aire todo o día que posto poderían ocupar personalidades da política popular lucense, como o delegado territorial da Xunta, Javier Arias, aínda que ao final non formará parte da executiva xunto a Candia. Arias si está na executiva galega de Feijoo, do mesmo xeito que a alcaldesa de Triacastela, Olga Iglesias.