Cargos electos e alcaldes, incluída a independente de Monterroso, sumáronse á protesta
17 abr 2021 . Actualizado ás 17:03 h.Os alcaldes dos concellos de Guntín , Portomarín, Taboada, Chantada, Monterroso (independente), Carballedo e Antas de Ulla: María José Gómez, Juan Serrano, Ramiro Moure, Manuel Varela, Rocío Seijas, Julio Yebra e Javier Varela, respectivamente; acompañados da presidenta provincia do PP, Elena Candia; e dos senadores populares por Lugo, José Manuel Barreiro, Rosa Arza e o propio rexedor chantadino, así como da deputada autonómica, Raquel Arias; manifestaron cun acto de concentración «o seu apoio rotundo ás demandas dos veciños respecto do estado no que se atopa a N-540, que comunica Lugo con Ourense, e que xa chegaron tamén ao Defensor do Pobo de España».
Os populares, que se concentraron nun dos tramos máis afectados desta estrada nacional, o que atravesa Guntín, proporán con varias iniciativas o arranxo inmediata tanto no Senado como no Parlamento de Galicia. O senador lucense José Manuel Barreiro explicou que «o Ministerio de Transportes non pode permanecer alleo á odisea á que se enfronta os centos de usuarios que cada día empregan esta estrada, chegando incluso a poñer en risco a súa seguridade polo mal estado que presenta».
Esta vía, de titularidade estatal, ten no seu trazado numerosas fochancas, liñas esvaecidas e un firme case intransitable. Os populares urxen a súa mellora «porque é a única opción dispoñible para ir dende Lugo a Ourense, xa que non existe autovía que comunique estas dúas cidades», lembrou o senador lucense.
Un accidente cada 3 días
Desde o PP sinalaron que risco desta estrada nacional pódese comprobar nos datos, xa que desde o 2018, «vense rexistrando un accidente de tráfico cada tres días, en total, máis de 430 sinistros producidos, en gran parte, polo seu mal firme. É, por este motivo, polo que dende o PP fan esta reclamación».
A alcaldesa de Guntín, María José Gómez, cuxo Concello leva anos reclamando a reforma da travesía, apuntou que «en ocasións teñen que realizar manobras perigosas para evitar pinchazos ou que un cristal do seu vehículo rompa a causa da grava solta, chegando incluso a invadir o carril contrario. As posibilidades de accidente son elevadísimas».
Pola súa banda, Elena Candia, como presidenta dos populares na provincia e deputada no Parlamento dixo que «agardo unha resposta áxil do Goberno, xa que todos lembramos como cando gobernaba o PP en Madrid varios socialistas se concentraron nesta estrada para esixir responsabilidades e, agora, unha vez que chegaron á Moncloa, desas demandas nada de nada, só se dedican a protexer a Sánchez».
Candia lembrou os plans que presentou no seu día o Goberno de Rajoy para investir na reforma da N-540, e que ascendían a 20 millóns de euros: 6,6 para mellorar tres tramos; 6 para a conservación; 2 para seguridade viaria; 1,5 para bacheo de urxencia e 4 millóns dos orzamentos do 2018. «Ademais, incluíanse 2,5 millóns para o intercambiador da A-54 con esta nacional, en Guntín, pero que o Goberno de Sánchez eliminou das contas estatais, tal e como xa denunciaron os populares en diversas ocasións», explicaron.
