José Luis Ábalos sobre a autovía Lugo-Santiago: «Estamos a traballar para superar as incidencias ambientais e patrimoniais»
LUGO
O ministro de Transportes puxo en valor os 546 millóns «que permitirán a Lugo conectarse coa rede de Alta Velocidade e mellorar o servizo para o transporte de mercancías»
09 abr 2021 . Actualizado ás 16:58 h.O ministro de Transportes, José Luis Ábalos, e o presidente da Xunta, Alberto Núñez Feijoo, abordaron esta mañá en Santiago diversas actuacións que o Goberno realizará na nosa comunidade e as obras pendentes e que leva anos reclamando Galicia. Dentro desas cuestións, analizáronse algunhas referidas á provincia de Lugo.
Sobre a finalización das obras da autovía de Lugo a Santiago, A-54, con dous tramos en execución, o de Palas de Rei a Melide e o de Melide a Arzúa , o ministro recoñeceu que existen problemas que atrasaron a apertura, prevista para este ano no primeiro tramo e para o 2022 para o segundo. Ábalos non se aventurou a dar unha data e limitouse a dicir: «Estamos a traballar para superar as incidencias ambientais e patrimoniais nos traxectos restantes». O ministro, iso si, puxo en valor que o Goberno están a executar o maior viaduto da provincia de Lugo, o de Pambre, dun quilómetro de lonxitude, que cualificou como unha das obras de enxeñería máis avanzadas que se están realizando en España.
Tamén cualificou de actuación innovadora o inicio da fase de construción e experimentación en campo dos instrumentos de illamento, eliminación e desprazamento das néboas no Alto do Fiouco na A-8, na provincia de Lugo.
Sobre estradas, o presidente Feijoo aceptou os problemas na A-54, aínda que dixo que lle gustaría que estivese canto antes acabada, pero pediulle ao ministro que se dean pasos iimportantes para retomar a autovía A-56, de Lugo a Ourense. En concreto, pediu que se axilicen os tramos desde San Martiño ata Cambeo e a súa continuidade cara a Ourense, lembrando que o tramo aberto actualmente, de 9 quilómetros en Carballedo, é pouco útil ao non ter continuidade. Feijoo tamén lle pediu ao ministro que se axilicen os trámites para a autovía da Mariña.
A reforma da vía de tren Lugo-Ourense, lista para o 2024
Xa en materia ferroviaria, o ministro Ábalos puxo en valor os 546 millóns que licitará ADIF na liña férrea entre Lugo e Ourense: «Faremos un forte impulso á renovación da liña Ourense-Monforte-Lugo, cun investimento de 546 millóns de euros, que permitirán a Lugo conectarse coa rede de Alta Velocidade e mellorar o servizo para o transporte de mercancías».
Pola súa banda, Feijoo agradeceu este investimento e confiou en que no 2024 estea acabada o que denominou primeira fase da renovación da vía, confiando en que no futuro se faga a segunda fase, que inclúe as variantes dos Peares e Rubián, que acurtarían a viaxe de Lugo a Ourense en 23 minutos. Para Feijoo é fundamental que Lugo conte cun AVE que lle conecte con Madrid.
Sobre a estación Intermodal de Lugo, o presidente da Xunta sinalou que vai atrasada e espera que nas próximas semanas déanse os avances necesarios para a súa execución.
