A compaña Ste Xeito Producións porá en escena esta tarde «Feminissimas», no Gustavo Freire
20 ene 2021 . Actualizado ás 12:43 h.O teatro volverá ser protagonista da oferta de lecer, coa posta en escena de Feminissimas, a cargo da compaña Ste Xeito Producións. A obra está ambientada nun congreso feminista en Vigo: «Tres amigas da adolescencia que hai anos que non se ven. Tres maneiras ben distintas de entender o feminismo: feminismo radical, feminismo liberal e postfeminismo. Un moderno airbnb será o espazo onde se reencontren a noite antes do Congreso. Poderías ser amiga de alguén que pensa radicalmente diferente a ti? En resumo: Unha comedia negra, moi violeta». A función, recomendada para público adulto, terá lugar ás 20.00 horas no Auditorio Municipal Gustavo Freire. As entradas custan 5 euros e poderán adquirirse na páxina web entradaslugo.é, na Oficina Municipal de Turismo ata tres horas antes do comezo de cada función, ou no propio auditorio desde media hora antes do inicio do espectáculo. Hai un desconto do 30% para persoas en paro, menores de 30 anos, pensionistas e actores e actrices asociados á AAAG.
Doutra banda, no centro cultural O Vello Cárcere establecéronse varias quendas para visitar por libre o centro, cunha duración máxima dunha hora e cuarto. Os horarios de inicio son os seguintes: de domingo a mércores, ás 11.15, 12.30, 17.15 e 18.30 horas; e de xoves a sábado, ás 11.15, 12.30, 17.15, 18.30, e ás 19.45 horas.
Ademais, tamén no Vello Cárcere terá lugar a actividade «Construíndo memoria», un obradoiro divulgativo para adultos para ampliar os contidos da mostra permanente do centro. Será ás 19.30 horas e a entrada é gratuíta, previa inscrición no 982 297 195.
Doutra banda, Lugo será a única das grandes cidades de Galicia que participará o xoves 21 no cume nacional de Invest inCities , que se celebrará on-line (https://www.investincities.com/cumbrenacional/) e na que tomarán parte 18 cidades españolas. A alcaldesa, Lara Méndez, exporá sobre as 10.50 horas as vantaxes competitivas de Lugo nun evento no que participarán máis de mil investidores e representantes de quince países.