Terceira División A Polvoreira dobregou ao Racing Vilalbés, que lle gañou o día de Reis
17 ene 2021 . Actualizado ás 20:39 h.A Polvoreira dobregou ao Racing Vilalbés no derbi provincial da Terceira División, que se disputou no campo da Cheda. Con esta vitoria, o filial do CD Lugo consumou a vinganza ante o cadro chairego, que o día de Reis había goleado -foi un 5-1- ao seu opoñente.
Aínda que o partido comezou con igualdade, pronto se fixo co dominio do mesmo a Polvoreira, cuxos futbolistas sortearon á perfección a presión asfixiante que dispuxo Simón Lamas para evitar que creasen perigo. Ademais, nas recuperacións aos chairegos custáballes enlazar dous pases seguidos, unha circunstancia que se traduciu en escasas ocasións de gol.
A Polvoreira cada vez que se achegaba á meta de Javi Pita levaba sensación de perigo. De feito, as internadas de Morais pola banda e as súas asistencias trouxeron en xaque á defensa do Racing Vilalbés. No entanto, tampouco houbo ocasións claras de gol nesta primeira entrega. A máis clara foi un man a man de Cristian, que abortou o gardameta visitante. O perigo do Racing Vilalbés viño en xogadas de estratexia. Co empate inicial (0-0) concluíu a primeira parte.
A segunda entrega
Na segunda parte continuou o mesmo guion, cun Racing Vilalbés que aínda intensificou máis a súa presión. A pesar diso, foi a Polvoreira o que se adiantou no marcador. Unha internada de Morais que asistiu a Cristian para que este aloxase o balón no fondo das mallas.
Con esta desvantaxe parcial, o cadro de Simón Lamas buscou o empate. De feito, Cadrado tivo unha clara ocasión para neutralizar a vantaxe local, pero finalmente non a materializou en gol. Quen non perdoou foi Cristian, que rematou outra asistencia de Morais, pondo o definitivo 2-0.
Lonxe de vir abaixo, os discípulos de Lamas intentaron acurtar distancias no luminoso, pero non tiveron a claridade doutras ocasións. Tampouco lles axudou o feito de que quedasen cun futbolista menos no minuto 70 por expulsión de Diego Muíña. A partir de aí, a Polvoreira baixou a súa intensidade e apostou por fútbol control.
Pola súa banda, o Racing Vilalbés tratou de que non chegasen máis goles, xa que o que tocaba era manter a gol average a favor. No municipal da Magdalena, os chairegos endosaron un 5-1. «Do que se trataba era de manter a golaveraxe, posto que esta vai ser unha liga moi igualada», comentou o adestrador do Racing Vilalbés, Simón Lamas, que admitiu que a Polvoreira era xusto vencedor. Pola súa banda, o técnico do filial do CD Lugo, Álex Ortiz, felicitou aos seus futbolistas polo triunfo. «Estou moi contento co seu traballo, e considero que a clave foi o perigo que xeramos en ataque co balón», apuntou.
O Racing Vilalbés é terceiro e a Polvoreira ocupa a cuarta praza.
2
Julen; Asier, Vidal, Jesús, Morais; Núñez, Escobar, Torrado, Quindimil; Cristian e Iago Novo. Tamén xogaron Fidalgo, Gabarre e Guitián.
0
Javier Pita; Buyo, Diego, Vérez, Muíña; José Varela, Lamas, Cadrado, Fran Sandá; Pedrosa e Anxo. Tamén xogaron Rares, Aitor, Castro e Caballero.
GOLES: 1-0, min.48, Cristian; 2-0, min.56, Cristian.
ÁRBITRO: Rodrigo García Gómez. Expulsou ao futbolista do Racing Vilalbés, Muíña, no minuto 70. Amoestou aos locais Torrado, Escobar e Bello , e aos visitantes Muíña -foi expulsado no minuto 70-, Diego López e Castro.