O técnico lucense márchase a Europa do leste tras un periplo en Grecia e en Formentera
05 ene 2021 . Actualizado ás 18:24 h.O exentrenador do Lugo, Víctor Basadre, orixinario da cidade amurallada, anunciou esta semana a súa fichaxe polo Suduva Marijampole, club da Primeira División da liga lituana. O conxunto, que gañou as tres últimas ligas do seu país, asinou a Basadre ata o fin do ano 2022, polo que terá dúas tempadas completas para repetir éxitos. A liga lituana, do mesmo xeito que moitas de Europa do Leste, dispútase entre o mes de marzo e o mes de outubro, para evitar o frío inverno da zona máis oriental do vello continente, polo que o equipo se atopa agora en plena preparación da pretemporada.
Basadre comezou a súa carreira no S.G. Comercial Estudantes, no ano 1989, e pasou por Mérida ou Murcia antes de fichar polo C.D. Lugo no ano 2000. Estaría alí ata o 2003, cando puxo rumbo ao S.D. Noja cántabro. Máis tarde, tería periplos por Murcia ou Formentera, ata que en 2019 colleu os mandos do Volos NPS da liga grega. Agora, comeza unha nova etapa na descoñecida liga de Lituania.