Ofrece apoio á Xunta para pór en marcha outro sistema asistencial
03 dic 2020 . Actualizado ás 21:09 h.Un modelo asistencial baseado nas persoas e non no negocio. Así definiu este xoves o presidente da Deputación de Lugo, José Tomei, a rede de residencias que o organismo provincial ten en marcha en distintos municipios. Na súa intervención no Parlamento de Galicia, onde acudiu para presentar os orzamentos da Deputación do 2021 (92,5 millóns), referiuse á rede de xeriátricos en dúas vertentes.
Por unha banda, destacou a validez do proxecto: «O noso modelo público de xestión das residencias viuse revalidado coa chegada da pandemia», dixo. Ademais suxeriu que se trataba dunha idea que a Xunta debería imitar, para o que ofreceu colaboración: «Podémoslle botar unha man. A experiencia demostra que somos un bo espello no que mirarse», afirmou. Doutra banda, achegou datos sobre este asunto: lembrou que había unha partida de oito millóns nos orzamentos do 2021 e que se prevía a apertura doutras catro residencias —Navia de Suarna, Pedrafita do Cebreiro, Castroverde e Meira—, chegándose así a 400 prazas e a 200 traballadores.
Tamén recalcou que o sistema de xestión pública resultaba decisivo para garantir o benestar e a seguridade das persoas que viven nesas residencias, e citou ademais a recente presenza nun foto europeo para explicar que o modelo da Deputación de Lugo interesa fóra de Galicia.
Campo, mar, monte e turismo
Tamén destacou Tomei as partidas dedicadas a outros sectores como exemplo de aposta por sectores considerados estratéxicos. Os 2,3 millóns reservados para o sector agropecuario, o forestal e o pesqueiro non só representan un aumento do 13 % senón que pretenden estimular a competitividade e a creación de valor engadido.
Os tres millóns que se recollen para o turismo —un incremento do 10 %, apuntou Tomei— son un intento de apoiar un dos sectores «peor parados nesta crise»: fomentar o turismo interior e os produtos de proximidade é unha prioridade da Deputación, que, doutra banda, confía en que a Ribeira Sacra logre a declaración de Patrimonio da Humanidade e en que o Xacobeo 2021 axude á promoción da provincia, pola que pasan catro rutas xacobeas.
Non faltou na intervención de Tomei unha alusión ao Plan Único, iniciativa coa que se transfiren fondos aos concellos. Nese asunto, tamén combinou a cifras coas explicacións: por unha banda, destínanse 11 millóns nos orzamentos, aínda que a cantidade total chegará aos 21, porque se incorporarán remanentes; por outro, manifestou que a Deputación actúa como «concello dos concellos» e fixo unha acesa defensa do municipalismo e da función deste organismo: «Somos a administración á que primeiro chaman os cidadáns cando teñen un problema», explicou.
Estradas
Outra partida subliñada foi a de mobilidade, con 16 millóns —é un 14 % máis, dixo— para mellora e conservación das estradas da rede provincial, non só como un servizo aos veciños senón tamén como aposta pola obra pública en tempos de crise.