O equipo dirixido por Diego Epifanio completou a primeira semana de adestramentos
22 ago 2019 . Actualizado ás 19:50 h.O Leite Río Breogán comezou a adestrar o pasado luns da man de Diego Epifanio cun obxectivo claro: volver competir na máxima categoría do baloncesto nacional. O equipo sufriu unha tremenda rexeneración este verán no que o persoal cambiou case por completo. Os xogadores que chegaron deberían ofrecer garantías para competir ata o final polo ansiado ascenso.
Onte celebrouse o habitual acto no que os xogadores e adestrador reciben o vehículo oficial do club grazas ao patrocinio e colaboración con Hyundai e o grupo Ditram. Os xogadores presentes no acto foron tres das novas fichaxes: Roope Ahonen, Thomas de Thaey e Rauno Nurger.
Outro dos breoganistas presentes no acto foi Tito Díaz, director deportivo do Breogán, que agradeceu ao Grupo Ditram a confianza mostrada cara ao club todas estas tempadas. «Queremos dar as grazas a Hyundai por seguir apostando por nós un ano máis a pesar do traumático descenso. Temos que recoñecer que para nós é un apoio importante porque a vida dos xogadores e a dos técnicos é máis doado en Lugo cun coche para os desprazamentos», sinalou o lucense.
Diego Epifanio, o novo técnico celeste, tampouco quixo perderse o acto e deu mostras da súa boa adaptación a Lugo e ao equipo nestes primeiros días de pretemporada. «Todo o mundo no club estame dando moitas facilidades e estase preocupando para que a miña adaptación sexa moi rápida. O staff está a traballar no que eu creo e os xogadores están a pór moito da súa parte. De momento estou moi cómodo en Lugo», indicou o técnico.
Ademais, mostrouse contento cos xogadores que chegaron ao club. «Fixemos un bo persoal, agora temos que facer un bo equipo. Seguro que nós imos dar guerra e daremos que falar na liga», afirmou Epifanio apuntando a existencia doutros equipos que se reforzaron igual de ben ou mellor, como é o caso de Delteco GBC, Mallorca ou Melilla. «Vai ser unha liga divertida», sentenciou.
Así mesmo, o preparador burgalés recalcou a importancia de crear un vestiario unido para lograr os obxectivos fixados. «Estamos a empezar a coñecernos entre corpo técnico e xogadores. Faltan un par de xogadores por incorporarse. Aos poucos iremos construíndo vestiario, que é o que nos dará forza», dixo Diego Epifanio.
O equipo continúa centrándose , sobre todo, no traballo físico, aínda que cada vez están a dar máis importancia aos exercicios con balón. O conxunto breoganista agarda chegar en forma para o primeiro encontro de pretemporada ante o Benfica no Pazo o próximo 31 de agosto no que será o partido de presentación.
A secretaría técnica xa busca un xogador para substituír a Marcius como pivote
O pasado mércores o club comunicou que o pivote croata Aleksandar Marcius non logrou superar as probas físicas ás que se someteron os xogadores por unha doenza na perna dereita que o terá apartado das pistas durante os próximos dous ou tres meses.
A lesión de Marcius supuxo un contratempo para o Leite Río Breogán. O persoal levaba tempo pechada pero, tras esta baixa, o equipo lucense deberá volver ao mercado e cubrir o posto.
A secretaría técnica do club, comandada por Tito Díaz, estivo traballando todo o verán en realizar informes de xogadores que puidesen interesar aos breoganistas. A base de datos é grande e o club xa sonda o mercado para atopar ese pivote dominante que complete por fin o persoal.
O obxectivo é conseguir un xogador que axude desde o primeiro momento e que se axuste rápido á dinámica de grupo. «Queremos acertar co xogador que traiamos. Temos que saber elixir», informou Epi. A paciencia será clave á hora de fichar a ese xogador interior que parecían ter atopado en Sandi Marcius. Actualmente, a posición cóbrena Fall e Rauno Nurger.