A Fundación Deporte Galego entrega as axudas en concepto de patrocinio publicitario de alta competición
03 jul 2019 . Actualizado ás 20:40 h.O plan de patrocinio publicitario da Fundación Deporte Galego repartirá neste 2019 338.085 euros entre 18 equipos da provincia de Lugo. Onte o secretario xeral para ou Deporte, José Ramón Lete Lasa, participou na cidade amurallada no acto de entrega dos convenios. Un evento ao que asistiron representantes dos distintos clubs, así como o delegado territorial da Xunta, José Manuel Balseiro, o xerente da Fundación Deporte Galego, Iván Caravel, e o director territorial de Abanca, Javier Soto Garrido, xa que o importe está cofinanciado entre o goberno autonómico e a entidade bancaria.
Respecto ao ano pasado, a cantidade repartida no 2019 rexistra un incremento notable, concretamente, un 51 % máis, pois se pasa dos 223.622 a máis de 330.000 euros. Dos 18 equipos patrocinados, 11 son femininos, un dato que subliñou Lete Lasa como mostra da aposta da Xunta polo deporte feminino na provincia lucense.
Os clubs que se beneficiarán do patrocinio publicitario da Fundación son o Club Porta XI X.B., o Club Tríatlon Cidade de Lugo Fluvial (dúatlon feminino e masculino), o Club Tríatlon Cidade de Lugo Fluvial (tríatlon feminino e masculino), a Asociación Deportiva Tripenta Terras de Lugo (dúatlon feminino e masculino), o Club Barbería Mixta Friol, o Club Deportivo Burela Fútbol sala (fútbol sala feminino e masculino), o Club Hóckey Feminino Meigas, o Club Patíns Lóstregos Lucus, o Club de Loitas Olímpicas Vilalba, o Club Fluvial de Lugo (piragüismo sprint feminino e masculino), o Club Piragüismo Cidade de Lugo (piragüismo sprint feminino) e o Club Emevé (voleibol feminino e masculino).
Retorno importante
Durante o acto de entrega dos convenios de patrocinio Lete Lasa eloxiou e agradeceu o papel de Abanca, co «esforzo e a aposta decidida polo deporte galego» seu que posibilita «todos estes datos que serían inalcanzables doutro xeito». Defende Lete Lasa ademais que «o maior banco de Galicia amosa ás entidades privadas que o patrocinio deportivo ten un retorno importantísimo que axuda a calquera empresa a medrar económica e socialmente».
Na convocatoria do 2019 son 191 equipos de toda a comunidade os que recibirán o respaldo do patrocinio publicitario da Xunta, o que supón un 12 % máis que o ano pasado, cando as axudas chegaran a 171 conxuntos. En total, dentro dos convenios de patrocinio publicitario dos equipos de alta competición entregaranse 3,3 millóns de euros, un 37 % máis que os 2,4 millóns que se distribuíron o ano pasado.
Máis aló das cantidades, este plan inclúe novidades como a simplificación administrativa, que permitirá axilizar os pagamentos, que pasan de tres a dous, así como a creación dun grupo de patrocinio para modalidades e especialidades olímpicas e paralímpicas con equipos en campionatos de España de máximo nivel, kárate, loita, natación e ximnasia.