O bo estado dalgúns complexos contrasta coas graves deficiencias que teñen outros
25 jun 2019 . Actualizado ás 13:15 h.O mantemento das instalacións deportivas é desigual en Lugo. Mentres algunhas están completamente abandonadas á súa sorte, noutras costa atopar un pero.
O campo de béisbol do Ceao, o Germán López Vila, perdeu a súa dignidade hai tempo. A rede de protección está rota tras a caixa de bateo, hai un valo tirado sobre a pista e as liñas que marcan a carreira entre as bases están completamente despintadas. O montículo do lanzador está cuberto de maleza e o outfield ou os xardíns que rodean a liña de grama están a monte. Faltan bancadas e as que hai están absolutamente carcomidas ou rotas. É un dos casos máis extremos.
Mentres a cidade deportiva de Tino Saqués (o presidente do Lugo) non desembarque en San Fiz, os usuarios non poderán aproveitar o campo de fútbol nin o de rugbi existentes. Non poderán facelo porque a maleza se apropiou do lugar, facendo das porterías e os arcos elementos unicamente decorativos.
As pistas de atletismo da Cidade Cultural, con acceso desde o instituto masculino ou Pintor Corredoira, tamén teñen carencias notables. A gaiola dedicada ao lanzamento de martelo ten a rede caída, os números das rúas están case borrados e a herba crece á súa antollo na area destinada ao salto de lonxitude.
O polideportivo do Pombal tamén ten as súas carencias, aínda que en xeral o estado do conxunto é aceptable. As pistas situadas no exterior son as que están en peores condicións. O firme das pistas de tenis é mellorable e os aros das canastras da zona anexa están en malas condicións: sen rede, oxidados e tortos. A zona cuberta está en boas condicións e a zona destinada ao fútbol sala e ao voleibol conta con marcadores novos. O parqué viviu o seu, aínda que o seu estado é aceptable. O único problema desta instalación é a súa pista de baloncesto . Só se poden xogar competicións de mini-básquet ou ligas locais porque a liña de triplo está pintada no 6,25 e non no 6,75 como indica a normativa. Non pode repintarse, porque esixiría mover tamén o ancho da pista non habería oco para o espazo necesario de seguridade. A instalación podería especializarse en competicións para nenos, aínda que sería necesarios desmontar as canastras fixas á parede, que son de baloncesto.
Hai outras instalacións deportivas nas que custa atopar un pero. É o caso de Frigsa. O complexo polideportivo é sin duda un dos mellores conservados e dotados da cidade, aínda que o estado dos seus accesos é mellorable. Cidadáns reclamaba onte unha serie de arranxos na contorna ao seu campo de fútbol municipal Luis López Gorgoso. Os concelleiros Olga Louzao e Juan Vidal-Pardo denunciaban onte que os pais que xogan no campo queixáronse do estado das beirarrúas circundantes, con baldosas completamente levantadas. Louzao esixiu ao goberno municipal que preside Lara Méndez «que aproveite as vindeiras semanas para acometer estes traballos para que cando no vindeiro mes de agosto comecen os adestramentos de cara á vindeira tempada os accesos a esta instalación municipal estean en perfecto estado».