O saldo vexetativo do 2017 é o máis negativo nesta provincia desde que existen rexistros estatísticos
22 jun 2018 . Actualizado ás 19:18 h.O peor saldo vexetativo de todas as comunidades autónomas é o de Galicia. E en Galicia, o peor saldo vexetativo é o de Lugo. Durante o ano 2017 producíronse nesta provincia 2.078 nacementos e 5.171 defuncións. Son datos que acaba de dar a coñecer o Instituto Nacional de Estatística (INE) e que demostran que a perda de poboación na provincia de Lugo non é nova, porque o saldo vexetativo é negativo todos os anos desde 1980, pero tamén que se está acentuando. Os números do 2017 son, con diferenza, os peores desde que existen rexistros estatísticos.
Hai decenios que na provincia de Lugo morre máis xente da que nace. En 1975, o primeiro ano do que o INE ten estatísticas dispoñibles en Internet, o saldo vexetativo xa era negativo. Cinco anos despois, ao comezo da década dos oitenta, os nacementos superaban lixeiramente aos falecementos, pero a partir de aí a baixada foi continuada. A diferenza negativa non ten tanto que ver con que o número de nacementos baixe como con que as defuncións se incrementan a un ritmo notablemente maior.
Segundo as estatísticas do INE, o cociente de nacementos por cada mil habitantes durante o 2017 foi na provincia de Lugo de 6,24. É un dato lixeiramente inferior ao do ano anterior, pero non é o peor dos últimos anos. Esa cifra mantense por amais de 6 desde o ano 2006. En cambio, as defuncións do 2017 foron 15,57 por cada mil habitantes, a cifra máis alta de toda a serie estatística dispoñible.
Para establecer comparacións, o INE emprega o concepto de saldo vexetativo por cada mil presentas. É dicir, no canto de usar a cifra resultante de restar as defuncións aos nacementos, o que complica as comparacións entre as provincias máis poboadas e as máis pequenas, fai un cálculo proporcional. Pois ben, o saldo vexetativo por cada mil presentas foi o ano pasado en Lugo de -9,24, lixeiramente peor que o -9,22 de Ourense e moi lonxe do -3,77 da Coruña. Entre todas as provincias españolas, só a de Zamora ten un cociente peor, con -10,4.
Non están dispoñibles aínda os datos de nacementos e defuncións rexistrados no 2017 por municipios. De todos os xeitos, as do 2016 non deixan lugar a dúbidas: ningunha comarca líbrase da tendencia dominante. A diferenza negativa entre nacementos e defuncións é en xeral proporcionalmente maior nos municipios máis pequenos, pero os grandes son os que lideran o descenso con perdas de poboación máis pronunciadas en cifras totais. no 2016 Lugo perdeu 22 habitantes e Monforte, o segundo municipio máis poboado, deixouse 187.