O Racing Vilalbés quere empezar con bo pé a batalla pola Segunda B dobregando aos de Sebas López en casa
20 may 2018 . Actualizado ás 05:00 h.O Racing Vilalbés quere chegar a Pulpí coa eliminatoria encarrilada. Os de Óscar Gilsanz buscarán espremer o factor campo esta tarde, cun resultado positivo contra o Pulpileño. Os de Sebas López intentarán non deixarse pisar para noquear aos chairegos no partido de volta. O balón botará a rodar na Madalena ás 17.00 horas.
O duelo estará cargado de alicientes. Tras a mellor tempada lla súa historia, os verdirrojos intentarán manter a dinámica positiva en casa e saborear un premio do que se sentiron privados por moi pouco nas últimas campañas. O reencontro con Bruno Caballero será bonito. O central arxentino militou no Racing a tempada pasada, cando o seu irmán Pablo vestía aínda a branquivermella do Lugo.
Promocións
Os racinguistas sacaron onte, á venda na Pravia, unha promoción que inclúe camiseta e bufanda a un prezo de 15 euros. Hoxe a bancada chairega podería lucir máis colorida que nunca.
A ilusión pola fase de ascenso contáxiase desde o club verdirrojo, que ademais preparou un paquete de viaxe para aqueles afeccionados que queiran acompañar ao equipo a Pulpí (Almería). Por 150 euros (socios) e 170 euros, a promoción inclúe o desprazamento en autobús, o aloxamento nun hotel de tres estrelas e pensión completa.