Vinte e seis gandeiros pediron autorización para usar 1.000 hectáreas afectadas polo lume en outubro
18 abr 2018 . Actualizado ás 05:00 h.José Manuel Rodríguez Valcárcel, gandeiro de Vilanova do Pedregal, en Cervantes, é un dos 26 gandeiros que solicitaron por escrito poder pastorear nos terreos queimados esta primavera. Segundo asegurou, aínda agarda a resposta de Medio Rural á petición formulada. O que si recibiu foi unha carta na que lle advirten que se leva as súas 28 vacas aos pasteiros que arderon no mes de outubro do pasado ano exponse a unha multa que varía entre os 1.000 euros e os 100.000, dependendo de se se considera falta leve ou grave.
Rodríguez Valcárcel, que habitualmente utilizaba para o pastoreo 460 hectáreas de monte veciñal, non quere arriscarse a que o sancionen. Segundo explicou, se a Xunta permite pastorear nas zonas queimadas -puntualizou que non toda a superficie está en condicións para facelo- o problema para alimentar ao seu gando resolveríase. Agora as súas reses están a pastar nos prados que ten para segar a herba e conservala para o inverno.
Este produtor de Vilanova do Pedregal é un dos polo menos 26 afectados que presentaron a solicitude de pastoreo en zonas queimadas no mes de febreiro e aínda non recibiron resposta algunha. A única información que teñen respecto diso foron as declaracións públicas realizadas pola conselleira de Medio Rural, Ángeles Vázquez, no sentido de que se ía facer unha excepcionalidade, segundo lembrou Unións Agrarias, sindicato que tramitou parte das solicitudes. O seu portavoz para este caso, Iván Raposo, explicou que urxe unha solución porque nun prazo de 15 días haberá pasto fresco para o gando, que agora mesmo aínda está cuberto pola neve.
Os máis afectados son os gandeiros de Vilanova do Pedregal, Afreita, Xantes e Fontes de Xantes. Rodríguez Valcárcel, do mesmo xeito que o resto dos gandeiros, non recibiron ningunha das axudas prometidas no mes de outubro. «Prometeron moito -dixo- pero ou único que fixeron foi traernos de paseo e gastar cartos para amañar vos papeis». Este gandeiro lembra que as únicas axudas que recibiron foron as solidarias, que lles permitiron superar o inverno.
Os afectados arríscanse a multas de entre 1.000 e 100.000 euros se levan as vacas