É a segunda que renova a súa actividade esta semana no sur lucense, tras a de Folgoso do Courel
22 may 2020 . Actualizado ás 12:31 h.Tras a reapertura da oficina municipal de turismo de Folgoso do Courel, que renovou a súa actividade o pasado mércores, a de Sober súmase ás iniciativas para intentar reanimar a actividade no sector tras o longo período de inactividade motivado pola alarma sanitaria. O espazo informativo, situado na praza do Concello da capital, volveu a abrir as súas portas esta mañá e pode acoller visitantes de xoves a domingo, de 09.30 a 14.30 horas.
O local, segundo informa o Concello, foi preparado para volver recibir visitas seguindo as recomendacións da Xunta para as oficinas de información turística. «A guía de boas prácticas aplicouse para garantir a saúde no ámbito laboral das persoas traballadoras e tamén para ofrecer todas as garantías aos usuarios», precisan a este respecto.
Antes da reapertura levou a cabo unha limpeza e desinfección intensiva, unha tarefa que se repetirá de forma periódica. Así mesmo, colocáronse sinais que marcan a distancia mínima de dous metros entre as persoas e outros elementos de protección, como un biombo no mostrador de atención ao público e carteis e adhesivos informativos. Na oficina instaláronse ademais dispensadores de xel hidroalcohólico e para acceder ao interior esíxese o uso de máscara. Seguindo o protocolo de seguridade, tamén se retiraron os folletos de información turística, que agora só poden ser manipulados polo persoal municipal.