A curtametraxe, que leva o nome dunha adega do municipio, foi rodada o pasado verán
05 dic 2019 . Actualizado ás 16:11 h.O auditorio do centro sociocultural de Sober acollerá o día 13 —ás 21.00 horas— a primera proxección pública da curtametraxe Malcavada, dirixida por Antonio Mourelos e rodada no municipio o pasado verán. O acto contará coa presenza do realizador e comprenderá un aperitivo con viños da Ribeira Sacra.
Aínda que leva o nome real dunha adega situada no municipio de Sober, Malcavada non é un documental senón unha obra de pura ficción, segundo explica o produtor do filme, Monti Castiñeiras. «A adega do filme toma o nome da adega Malcavada, pero é unha adega imaxinaria que serve de escenario a historia que conta a curtametraxe», sinala. «Na película, a adega tamén é propiedade dunha muller, pero neste caso non é a dona da adega real, Araceli Vázquez, senón un personaxe ficticio chamado Alicia, e a historia que conta a película non ten relación coa vida real da muller que dirixe a adega Malcavada», engade. Por outro lado, a filmación non se levou a cabo na auténtica adega Malcavada, senón na Casa Grande de Rosende, un establecemento de turismo rural. O filme —unha historia «de viño e amizade», segundo os seus responsables— é interpretado polas actrices Neves Rodríguez, Ledicia Sola, Carmen Méndez e Marta da Costa. A rodaxe desenvolveuse tamén noutros escenarios do municipio de Sober, como o canón do Sil.