O sinistro de produciu durante o incendio da semana pasada na aldea de Riomaior, na parroquia de Margaride
18 sep 2021 . Actualizado ás 15:45 h.Aínda que o suceso pasou practicamente desapercibido mentres levaban a cabo as tarefas de control e extinción dos incendios forestais da semana pasada en Ribas de Sil, Quiroga e A Pobra do Brollón, o lume destruíu por completo dúas vivendas de tipo tradicional que estaban a ser restauradas na aldea de Riomaior , na parroquia quiroguesa de Margaride . Os dous inmobles estaban desocupados cando se produciu o sinistro, xa que o seu propietarios só os visitaban unha ou dúas veces ao ano, principalmente para continuar os traballos de rehabilitación. A intención dos donos era converter polo menos una das dúas casas nun aloxamento de turismo rural.
«Comprendemos perfectamente que os servizos de extinción lle desen prioridade aos núcleos habitados, pero para nós non deixa de ser un desgusto enorme, porque levábamos traballando na rehabilitación destas casas desde o 2014 e tiñamos moita ilusión neste proxecto», di a propietaria, María Martínez Sabarís, que reside habitualmente no Reino Unido. «Desde que compramos estes edificios, ademais de arranxalos pouco a pouco, estivemos percorrendo a zona e estudando a creación de rutas de sendeirismo para cando puidésemos poñer o establecemento en marcha, pero agora non sei se poderemos realizar algún día este proxecto», engade.
Cando se decatou do sinistro por uns veciños de Margaride, María Martínez atopábase no municipio pontevedrés de Portonovo, onde reside a súa familia, e para entón xa non había nada que facer. Ademais, os cascallos dun dos inmobles incendiados caeron sobre un camiño público. «Queremos que ese camiño quede libre para non causar problemas aos veciños que o utilizan e estamos mirando a ver se o Concello de Quiroga nos pode axudar dalgunha maneira, aínda que teñamos que pagar os traballos de limpeza», di a propietaria.
Riomaior deixou xa hai tempo de ter veciños de forma permanente e nos últimos anos, os donos das casas que forman o núcleo só o visitaban ocasionalmente para coidar o souto e algúns hortos.