A contorna da antiga explotación aurífera do Sil serve de improvisada zona de baños
14 ago 2020 . Actualizado ás 12:26 h.Os múltiples atractivos da Ribeira Sacra deixaron hai tempo de ser un segredo compartido por uns poucos. O tirón turístico da zona vai en aumento e non parece resentirse nin sequera dun verán condicionado pola pandemia. Sempre hai algo que descubrir nos seus apartados recunchos: vestixios do seu rico patrimonio monumental e etnográfico, espazos de alto interese ecolóxico ou, simplemente, un lugar tranquilo no que darse un mergullo. Os bañistas da foto combaten a calor nas augas do Sil ao pé mesmo do túnel romano de Montefurado, próximo á N-120 ao seu paso polo municipio de Quiroga .
A comarca de Quiroga caracterízase por posuír o que seguramente é o maior conxunto de explotacións mineiras auríferas da época romana en Galicia. Coa excepción do túnel de Montefurado, este patrimonio ata agora foi aproveitado dunha forma bastante limitada no aspecto turístico. O túnel romano foi escavado para desviar a canle e poder cribar as súas areas, mesturadas co ouro arrastrado polas augas desde os xacementos das Medulas.