Un encontro dixital substitúe o primeiro congreso sobre o aceite de oliva de Quiroga

Unha videoconferencia na que participarán diversos expertos en oleicultura substituirá o primeiro congreso sobre o aceite de oliva de Quiroga que o Concello proxectaba organizar nestas datas e que non poderá celebrarse por mor da alarma sanitaria. O encontro dixital levará a cabo hoxe e contará con «importantes entendidos do mundo do aceite», segundo apuntan os responsables municipais.

O congreso, tal como estaba planeado inicialmente, debía abordar cuestións como a historia do cultivo das oliveiras na comarca, o rexistro de variedades, as análises sensoriais e químicos, os beneficios do aceite de oliva virxe para a saúde e a elaboración e comercialización deste produto. Entre os participantes que estaban inscritos figuraban técnicos da Consellería de Medio Rural, expertos das universidades de Córdoba e Xaén, e representantes das empresas oleícolas Galpagro e Olearum. A videoconferencia, sinalan desde o goberno municipal, «non pode acoller todo o previsto para levar a cabo nos dous días marcados para esta xuntanza, pero si servirá para poñer en contacto a todos estes expertos co nexo común do aceite de oliva virxe extra de Quiroga».

O alcalde Julio Álvarez e o delegado da Xunta, José Manuel Balseiro, tomarán parte neste encontro dixital, cuxo obxectivo -engaden no Concello, é proporcionar un novo impulso á promoción do aceite de Quiroga, «que segue agardando pola súa denominación de orixe». O congreso debía servir de prólogo á vixésima Mostra do Aceite de Quiroga.

---

---

---