A N-120 permanece cortada no lugar do accidente e os vehículos pesados non poden circular polas vías alternativas
27 may 2020 . Actualizado ás 17:05 h.Unha muller resultou morta este mércores nun accidente de tráfico no municipio de Quiroga. O suceso produciuse ás dez e media da mañá na N-120 e bloqueou durante horas a numerosos camioneiros nese tramo de estrada.
A falecida viaxaba nun todo terreo que conducía o seu marido. Circulaban en dirección á localidade de Quiroga cando chocaron contra un camión que se detivo na beiravía da estrada por mor dunha avaría. O camión estaba parado no medio dunha curva, pero trátase dunha curva ampla e con certa visibilidade. O camioneiro colocara os triángulos de advertencia nas dúas direccións. El mesmo quedouse xunto a un dos triángulos para avisar aos condutores que se achegasen por alí. Pouco despois do accidente e aínda consternado polo sucedido, o home admitía que dubidara se pórse dun lado ou do outro, pero ao final elixiu o extremo máis próximo ao centro urbano de Quiroga porque alí a estrada chega en costa abaixo e pensou que aos camións que chegasen desa dirección custaríalles máis frear. O todo terreo das vítimas veu polo outro lado.
O condutor do todo terreo non viu a tempo o camión e chocou contra a súa parte traseira. El puido saír do vehículo tras o choque axudado polo camioneiro e foi trasladado nunha ambulancia ao hospital de Monforte. O corpo da súa muller foi rescatado polos bombeiros de Monforte, que para recuperalo utilizaron un equipo para cortar carrocerías.
A falecida é P.Q.M., de 77 anos. O ferido é J.C.Ou., de 80. Os dous vivían na parroquia quiroguesa de Conceado de Lor, situada xunto á estrada N-120 a uns doce quilómetros de distancia do lugar do accidente.
O accidente produciuse no quilómetro 494 da N-120, no tramo que pasa xunto á vila de Nocedo. Persoal de mantemento da estrada instalou puntos de información en Quiroga e en Conceado, a varios quilómetros do lugar do sinistro, para desviar por estradas secundarias o tráfico non local. Decenas de camioneiros quedaron bloqueados na zona, porque os vehículos pesados non poden circular polo trazado antigo da estrada entre Monforte e A Rúa. A Garda Civil de tráfico foi liberando o atasco primeiro mediante a apertura dun só carril e de forma alternativa para cada sentido da circulación. A circulación non se normalizou por completo ata as tres da tarde, despois de que o camión fose retirado por un guindastre.