Preferente A directiva elixe ao monfortino para dirixir ao equipo do Saviñao
01 dic 2021 . Actualizado ás 05:00 h.O Atlético Escairón xa ten novo adestrador. Trátase do exfutbolista monfortino Juan Torrado, que con 46 anos afronta o seu primeiro proxecto como técnico no fútbol galego. A súa amizade co director deportivo e o presidente do club do Saviñao, así como as ganas de adestrar foron determinantes para que o técnico teña dado o si á directiva.
«Fíxome moita ilusión que me chamasen, porque a adestrar é ao que me quero dedicar. Ademais, son mestre de Educación Física, e se que podo achegar o meu granito de area. Así mesmo, teño moita amizade cos directivos, polo que todos estes factores foron claves para que aceptase o reto», comenta Juan Torrado.
O novo inquilino do banco do Atlético Escairón chega con ganas, pero consciente da dificultade que entraña asumir a responsabilidade dun equipo que tan só suma tres puntos na clasificación da Preferente. «Imos traballar para reverter a situación. Veño con ganas de botarlles unha man e de sacar isto adiante», engade Torrado.
O monfortino ten claro o obxectivo. «A miña prioridade é que o Atlético Escairón manteña a categoría, pero se non o podemos conseguir, o obxectivo é sentar unhas bases de futuro para asentar o club. Quero crear un grupo humano no que reine o bo ambiente e tirar proveito ao máximo do talento que teñen estes futbolistas», indica.
A empresa non será sinxela, e é que ao equipo lle faltan vimbias, sobre todo na parte defensiva. E así o demostran os 32 goles que levan encaixados. Os reforzos son máis que necesarios, tal e como viñan pedindo non só o anterior adestrador, Julio Corral , senón tamén pesos pesados do cadro de persoal.
Sobre a chegada de posibles fichaxes, Torrado non quere precipitarse. «O primeiro que teño que facer é coñecer de primeira man o que hai, e a partir de aí tocará sentarse coa directiva e analizar as posibilidades do club para acometer algunha operación. Pero ata que leve varios adestramentos non tomarei ningunha decisión», conclúe.
Torrado xa dirixiu onte a última hora da tarde a súa primeira sesión preparatoria, e hoxe xa asumirá a responsabilidade de dirixir aos seus nos quince minutos que hai que repetir ante o Lemos. Non sabe se poderá sentarse ou non no banco, pero si estará na bancada.
A súa traxectoria
Como adestrador, Torrado ten experiencia na AE Prat, o Atlético Baleares e o Imperio de Albolote, onde tivo como xogador ao actual delegado do Selecta, Manuel Lucena.
Como futbolista estivo nos seguintes equipos: Arenas, Calasancio, Sober, Quiroga, Mindoniense, Lemos, Selecta 74, Tenerife B, Orotava, Imperio, Norma e Atlético Baleares —neste equipo xogou en Segunda B—. Estivo cedido no Lorca.