A oitava edición do percorrido automobilístico empezará en Monforte e desenvolverase entre o 8 e o 14 de xullo
25 jun 2020 . Actualizado ás 17:05 h.A oitava edición do rali turístico Terras do Incio arrincará o 8 de xullo de Monforte e discorrerá ata o 14 do mesmo mes por diferentes localidades da provincia. Esta é a primeira vez que todo o seu percorrido se limita ao territorio lucense, xa que en edicións anteriores se celebrou nas diferentes provincias galegas e tamén na comunidade de Castela e León. A nova edición do rali foi presentada en Lugo polo responsable de Promoción Económica e Social da Deputación, Pablo Rivera, xunto cos organizadores do percorrido, Andrés Castro e Pilar Debelius. Segundo explicaron na presentación, no rali tomarán parte vinte e cinco automóbiles clásicos de coñecidas marcas como Mercedes , Jaguar, Aston Martin, Maserati, Porsche, Morgan, Ford e Lotus, entre outras.
Os vehículos participantes no rali —procedentes de diversas comunidades españolas, de Portugal e de Francia— reuniranse o 8 de xullo da praza da Compaña de Monforte, onde estarán expostos desde as 11.00 ata as 19.00 horas. Durante os seis días seguintes, os automóbiles visitarán diferentes localidades da Ribeira Sacra lucense, a serra do Courel, a capital provincial, Vilalba e A Mariña, entre outros lugares. Os organizadores sinalaron que para que a convocatoria se desenvolva seguindo as «máximas condicións de seguridade e saúde» establecéronse medidas que xa foron comunicadas a todos os participantes e acordáronse protocolos de seguridade cos establecementos de hostalería que visitarán os automobilistas durante o seu percorrido.
Pablo Rivera agradeceu por outra banda o labor desenvolvido polos organizadores pora sacar adiante unha nova edición do rali turístico «a pesar da situación que estamos a vivir, ocasionada pola crise sanitaria da covid-19». A Deputación, engadiu, apoia esta iniciativa «porque favorece a proxección da nosa provincia e porque dinamiza sectores estratéxicos para a nosa economía, como son o hostaleiro e o comercial». O organismo provincial contribúe á organización do rali cunha axuda económica de 4.000 euros.