O Incio celebrou unha xornada de micoloxía nun momento con moitas anomalías na brotación de fungos
19 novs 2019 . Actualizado ás 05:00 h.Preto de cincuenta persoas participaron a pasada fin de semana nunha xornada de iniciación á micoloxía organizada polo Concello do Incio que comprendeu unha saída ao campo para identificar e colleitar cogomelos, así como unha degustación que levou a cabo no local social da parroquia de Trascastro. O micólogo Fernando da Pena, que se encargou de dirixir estas actividades, sinala que a excursión resultou frutífera e que só en cogomelos comestibles puidéronse identificar ata 31 especies. Pero a saída tamén puxo de manifesto as numerosas anomalías que se poden detectar este ano na brotación das diferentes variedades e que probablemente se deben ás pouco habituais condicións meteorolóxicas. «Os cogomelos estanse portando dunha forma tan rara como o tempo», comenta Da Pena a este respecto.
O micólogo sinala que no momento actual está a resultar moito máis difícil atopar exemplares de Macrolepiota procesa -a popular cerrota, o cogomelo comestible máis coñecida e consumida no sur lucense- do que debería ser a estas alturas. «Agora xa só ven uns poucos exemplares dispersos aquí e alá, e o curioso é que a finais de outubro houbo unha proliferación desta especie moi grande e repentina, unha explosión fóra do común que durou moi pouco tempo», di. Segundo conta, o día 29 do mes pasado visitou nos arredores de Monforte, con outras dúas persoas, unha leira na que puideron recoller unha gran cantidade de cogomelos desta variedade. «É un terreo de só uns douscentos metros cadrados no que un levou máis de noventa, outro máis de cen e eu como unha vintena», explica. «Foi algo esaxerado, pero moi pouco despois volvín ao mesmo sitio e só vin tres ou catro, o que tempoco é algo normal», agrega.
Ata o período do Nadal
Despois daquela brotación tan multitudinaria como efémera, continúa o micólogo, as cerrotas volvéronse sumamente escasas na comarca de Lemos. «Recordo que noutros tempos o normal era que os cogomelos desta especie empezasen a aparecer moi pronto, ás veces xa a finais de agosto, e que seguisen abundando ata finais de decembro, aínda que houbese xeadas fortes», sinala. «Teño recollido cogomelos deste tipo cubertas de xeo e algunha vez colleiteinas para a cea de Nadal ese mesmo día», agrega. Ao seu xuízo, algo así non vai ser posible este ano se continúa a tónica actual.
Outra anomalía rechamante que puido detectar Da Pena é que estes días se seguen atopando exemplares de Boletus aestivalis, unha especie -como indica o seu nome científico- máis propia do verán que do outono. «Normalmente a brotación remata en outubro e na segunda quincena dese mes xa non llas ve», sinala. Tamén se notan irregularidades -agrega- en diversos cogomelos pertencentes aos xéneros Russula e Tricoloma, que brotan en cantidades pequenas para esta época do ano, mentres as do xénero Cantharellus están a aparecer con moito atraso.
Da Pena di doutra banda que non ten unha explicación para estas e outras anomalías, aínda que apunta que «no que vai de tempada non houbo xeadas e isto pode ter favorecido a unhas especies á vez que prexudicou a outras». En calquera caso, ao seu parecer, os fenómenos desta clase estanse volvendo cada vez máis frecuentes nos últimos anos. «Agora dígolle á xente que en realidade non sei nada de cogomelos, porque os coñecementos que tiña en canto aos períodos de aparición e desaparición das distintas especies xa non serven nas condicións actuais», conclúe,