Un dos condutores do choque de Monforte triplicaba a taxa de alcol
MONFORTE DE LEMOS
O accidente ocorreu o sábado ao fío de que empezase o toque de queda
01 mares 2021 . Actualizado ás 16:36 h.Un dos condutores implicados no accidente do sábado pola noite en Monforte deu positivo na proba de alcoholemia que lle efectuaron tras o choque. Tres presentas resultaron feridas neste suceso, que se produciu cando chocaron entre si dous coches que circulaban en sentido contrario pola rúa Chantada.
O condutor dun dos dous turismos deu 0,80 mililitros de alcol por litro de aire expirado na proba á que foi sometido pouco despois do choque. Esta taxa triplica de longo o máximo de 0,25 que establece a lei. Pero é que ademais tamén supera os 0,6 a partir dos cales conducir pode supor incorrer nun delito contra a seguridade do tráfico. O condutor está denunciado por esa razón e terá que responder xudicialmente como investigado por este delito.
O accidente produciuse ao fío das dez da noite, a hora na que entra en vigor o toque de queda. A Policía Local, que é o corpo que instrúe o atestado por este accidente, non abriu ningún expediente de sanción por vulnerar as normas anticovid, porque os axentes que interviñeron consideran que o accidente puido producirse un pouco antes da hora límite.
Os dous vehículos implicados no suceso chocaron entre si á altura do número 58 da rúa Chantada. Patrullas das policías local e nacional cortaron esa rúa entre os cruces coa travesía Veiguiña e Eduardo Pondal ata que os vehículos sinistrados foron retirados por guindastres. Os dous coches implicados sufriron importantes desfeitas.
