O alcalde sinala que o certame se convoca en previsión de que a situación sanitaria permita celebrar as festas
23 feb 2021 . Actualizado ás 19:17 h.O Concello de Monforte convocou un concurso para elixir o cartel das festas patronais de agosto en previsión —segundo apuntou o alcalde José Tomei— de que «as circunstancias relacionadas coa crise da pandemia de covid-19 finalmente nos permitan organizar e celebrar estes festexos tan importantes para a nosa cidade». As bases do certame foron aprobadas nunha reunión da xunta municipal de goberno celebrada o pasado día 22.
De acordo coas bases, os interesados en participar no concurso deberán facelo con obras de creación propia, orixinais e inéditas, e poderán empregar o formato e a técnica que prefiran, sempre que sexa aptos para a reprodución en cuatricromía. Os deseños deberán incluír o texto «Monforte de Lemos. Festas patronais do 11 ó 16 de agosto 2021», distribuído da forma que escolla o autor. A entrega dos orixinais poderá facerse de xeito persoal ou ben por correo no rexistro xeral do Concello ata o 3 de maio. As obras que cheguen co cuño de Correos dunha data posterior non serán aceptadas..
As obras non poden levar nun lugar visible os nomes dos autores e deben ser presentadas nun sobre asinado con pseudónimo. Xunto cos carteis hai que entregar un sobre pechado cun documento no que figuren os datos persoais do autor, incluíndo a dirección postal completa, o número de teléfono e a dirección de correo electrónico. O xurado seleccionará unha soa obra, que se utilizará para editar o cartel anunciador e para ilustrar o programa das festas. O premio está dotado con mil euros, impostos incluídos. O cartel premiado quedará en poder do Concello. Aínda que a propiedade intelectual da obra corresponderá ao autor, a participación no certame implica a cesión exclusiva e gratuíta do seu uso ao Concello, así como a dos dereitos de reprodución, distribución, comunicación pública e transformación en calquera modalidade. O Concello, ademais, poderá exercer os seus dereitos sobre un fragmento da obra e adaptalo se se considera necesario.
O autor da obra gañadora, doutra banda, deberá entregar unha copia do cartel en formato dixital na que se incluirán os logotipos facilitados polo Concello e, se é o caso, das entidades patrocinadoras. A obra gañadora, xunto cunha selección dos mellores traballos presentados ao concurso, quedará temporalmente en poder da concellaría de Cultura co fin organizar unha exposición. Cando se peche a exposición, devolveranse os orixinais que sexan solicitados polos autores. As bases completas do concurso pódense consultar na web municipal. O fallo do xurado darase a coñecer o 10 de maio.