O alcalde comunica aos portavoces que está descartado case ao cento por cento que a sesión do luns sexa presencial
21 oct 2020 . Actualizado ás 12:54 h.A corporación de Monforte volverá celebrar os plenos por vía telemática. Esa será a fórmula da que se bote man na sesión prevista para o vindeiro luns, tras o anuncio da Xunta sobre a limitación das reunións a un máximo de cinco persoas. A posibilidade de celebrar o pleno de forma presencial está descartada «case ao cen por ven», sinalou este mércores o alcalde, José Tomei, na comisión informativa na que se abordaron previamente os asuntos incluídos na orde do día.
Ás oito da tarde, hora prevista para o comezo da sesión, os concelleiros deberán estar diante dos seus computadores para activar as videoconferencias que lles permitirán debater e votar as propostas incluídas no pleno. O equipo de goberno avanzou a súa intención de aprobar as ordenanzas fiscais para o próximo exercicio, requisito previo para poder dar posteriormente o visto e prace aos orzamentos do 2021. Se se aproban en novembro, tal e como está previsto, poderán entrar en vigor a comezos de xaneiro.
En canto ás iniciativas da oposición, Esperta Monforte adiantou que exporá unha proposta para que se retome a redacción do plan xeral de urbanismo de Monforte. A solicitude preséntase, segundo detalla o texto, «tendo en conta que o PSOE de Monforte levaba no seu programa de urbanismo, no punto 6, ‘empezar os estudos e traballos previos de cara á elaboración do PXOM de Monforte».
A proposta que subscribe o concelleiro Germán Vázquez fai referencia ademais ao feito de que o alcalde «leva meses facendo fincapé na imperiosa necesidade de cumprir o programa polo que os monfortinos o elixiron nas últimas eleccións municipais».
Doutra banda, e na quenda de preguntas, o concelleiro do BNG Emilio Sánchez interesarase polo sucedido co proxecto do refuxio para cans cuxa construción en Monforte anunciara a Deputación no anterior mandato.