Anuncian as primeiras obras en 30 anos na oficina da Seguridade Social en Monforte
MONFORTE DE LEMOS
Servirán para ampliar a sala de espera e a renovación do sistema eléctrico e a calefacción
20 oct 2020 . Actualizado ás 18:00 h.O Instituto Nacional da Seguridade Social (INSS) investirá 58.204 euros nunha reforma integral das súas dependencias en Monforte. Trátase da primeira obra de importancia que leva a cabo na oficina monfortina da Seguridade Social nos últimos trinta anos. Se todo vai como está previsto, as obras empezarán a principios do 2021.
A subdelegada do Goberno en Lugo, Isabel Rodríguez, telefonou este martes pola mañá ao alcalde de Monforte, José Tomei, para comunicarlle que o INSS acaba de sacar este proxecto a licitación. A subdelegada, o alcalde e o director provincial da Seguridade Social, Juan José Rodríguez Gude, visitaron esta oficina a finais do ano pasado. Comprobaron sobre o terreo que as dependencias teñen problemas de climatización e humidades derivadas ao parecer de que o seu illamento se atopa en mal estado.
O proxecto aprobado polo Goberno central para estas obras inclúe a ampliación da zona de espera, a renovación das instalacións eléctricas e de calefacción e un novo sistema de iluminación. Segundo os portavoces da subdelegación do Goberno en Lugo, unha vez rematada a reforma, as instalacións da Seguridade Social en Monforte gañarán en sensación de amplitude.
As empresas que queiran optar ao contrato teñen de prazo ata o 2 de novembro para presentar as súas propostas. As condicións da licitación están publicadas desde este venres na plataforma de contratatación do sector público en Internet.
Sete en persoal e 386 metros cadrados
A oficina da Seguridade Social en Monforte dispón dun persoal formado por sete persoas. Cunha superficie de 386 metros cadrados e situada no número catro da rúa San Pedro, nesta delegación traballan sete persoas, que atenden a 16.000 usuarios, residentes nas comarcas de Lemos, Chantada e Quiroga, unha área que suma unha poboación total de aproximadamente 50.000 persoas.
Este proxecto de mellora levará a cabo nunha época na que este servizo asume unha carga de traballo maior da habitual, polos efectos da pandemia e pola tramitación das solicitudes de inscrición no rexistro de beneficiarios do ingreso mínimo vital.
Na provincia de Lugo, a Seguridade Social ten en marcha outros dous proxectos que inclúen investimentos significativos. Trátase da construción dunha nova oficina en Viveiro, que está previsto ter listo en marzo do 2021; e o acondicionamento da delegación de Mondoñedo, que empezará antes de que remate este ano. A Seguridade Social dispón de sete oficinas na provincia de Lugo