O proxecto do parque segue adiante e á empresa só queda ir aos tribunais
12 ago 2020 . Actualizado ás 12:38 h.O Concello de Monforte desestimou o recurso presentado por Gas Monforte S.L. contra a declaración de interese público dos terreos próximos ao hospital comarcal nos que esta empresa pretendía levantar unha gasolineira. A idea de pór en marcha unha estación de servizo transcendeu despois de que o alcalde presentase o proxecto de construción dun parque nese mesmo lugar. A nova zona verde, un compromiso adquirido por Tomei cos veciños, incluirá unha zona de estacionamento con sesenta prazas.
Moi preto dese terreo está a ser instalada a primeira gasolineira de baixo custo en Monforte, dunha empresa diferente á que presentou o recurso que foi desestimado polo pleno municipal. «Son solares diferentes, aínda que a escasa distancia. Tamén as empresas son diferentes. Nun caso, conta cos informes sectoriais favorables da Consellería de Industria. Se non, non se lle daría licenza», explica.
No caso de Gas Monforte S.L., con sede en Santiago, Tomei sostén que non se puxo ningún informe sobre a mesa. «Nunca se dirixiron directamente [ao Concello], sempre chegaban rumores pola periferia dunha gasolineira de baixo custo», sinala. O equipo de goberno non se opón a que o proxecto leve a cabo noutro punto próximo á variante, a condición de que obteña o correspondente visto e prace da Xunta de Galicia. Pero o alcalde non está disposto a aceptar unha actuación que implica «tapar o hospital».
Segundo a información que transcendeu no pleno, Gas Monforte S.L. non só pretendía instalar unha gasolineira nos terreos nos que o Concello proxecta unha zona verde. O equipo de goberno desvelou que o proxecto desa empresa contemplaba ademais a construción dun edificio de varias plantas.
«Algunhas inmobiliarias e profesionais sábeno. Pretendían facer a gasolineira e unhas torres pensando que era urbano e non rústico. Como non se podía edificar, interesáronse pola recalificación», precisa Tomei. Á empresa só queda agora o recurso aos tribunais para frear o parque municipal.
O alcalde considera que o «impacto urbanístico» da actuación que se pretendía levar a cabo no soar lindeiro cos terreos do hospital xustifica a desestimación do recurso de Gas Monforte S.L. Pero non é a única razón. As pretensións desta empresa chocan, segundo indica, co compromiso adquirido cos veciños para construír «un parque e tamén un aparcamento que vai contribuír a solucionar o problema da escaseza de prazas nas inmediacións do hospital comarcal». «O interese xeral —engade— está claro, nese lugar necesitamos unha zona verde e de estacionamento máis que unha gasolineira».
O proxecto da zona verde do barrio do hospital deuse a coñecer en setembro do pasado ano. Tomei anunciou entón o inicio dos trámites para a compra ou, no seu caso, expropiación dos terreos que dan á vía de servizo de róldaa María Emilia Casas e ao tramo inicial da rúa Corredoira. Non houbo acordo cos propietarios e decidiuse que a parcela, de algo máis de 6.000 metros cadrados, fose declarada de interese público. A leira en cuestión está catalogada como chan rústico, polo que non é posible edificar nel sen un expediente de recualificación.
Uso dotacional
A catalogación de chan rústico, no entanto, é compatible co uso dotacional dos terreos, aproveitamento dentro do que entraría a instalación dunha gasolineira. A empresa que pretendía póla en marcha entende que non existe urxencia nin motivos suficientes para xustificar a declaración de interese social dos terreos.
