José Manuel Fernández, coñecido cazador de Monforte, morre atropelado tras unha batida
MONFORTE DE LEMOS
O propietario do antigo bar Morín detivo o vehículo no que viaxaba para revisar o remolque dos cans e foi acadado por un turismo
16 sep 2019 . Actualizado ás 19:41 h.Un coñecido cazador de Monforte, José Manuel Fernández, faleceu atropelado a última hora do domingo na estrada vella de Escairón. O accidente que lle custou a vida produciuse á altura da parroquia monfortina de Seoane, pouco antes das dez da noite. Nese momento regresaba a Monforte despois de participar nunha batida de xabaril nun municipio próximo.
O sinistro produciuse nunha gran recta de medio quilómetro onde a velocidade está limitada a 70 quilómetros por hora- O falecido viaxaba nun vehículo provisto dun remolque no que transportaba os cans. Ao parecer, detívose nunha zona de escasa visibilidade para comprobar se había algún problema con esa carga. Outro turismo que circulaba no mesmo sentido non se decatou da súa presenza e chocou contra o remolque, que como consecuencia do impacto acadou ao cazador causándolle a morte.
José Manuel Fernández era moi popular no sur lucense e noutros puntos de Galicia pola súa paixón pola caza. Acudía con frecuencia a outras zonas xunto coa súa cuadrilla para participar en monterías de xabaril.
Antes de xubilarse, convertera o Bar Morín de Monforte nun auténtico centro social ao redor do mundo da caza. Alí tiña as cabezas disecadas de varios xabarís xigantescos, moitos deles de máis de cen quilos de peso, que el abatera. Era raro a fin de semana que non recibía felicitacións de cazadores e veciños, por ter cazado algún deses xabarís que en moitos casos eran un pesadelo para os campos. Tamén era estraño a fin de semana que non houbese comida, cea ou reunión de cazadores no seu local, situado no barrio do mesmo nome, na estrada de saída cara a Lugo.