O gran incendio do día 5 en Monforte queimou máis superficie arboredo que monte baixo. É un dos datos novos facilitados esta mañá pola Consellería de Medio Rural no parte matinal sobre a situación dos incendios forestais de grandes dimensións que se produciron nos últimos días.
O incendio, que empezou entre as parroquias de Baamorto e Seoane e avanzou cara ao oeste ata chegar ao veciño municipio de Pantón, segue sen estar aínda oficialmente extinguido. Os técnicos da Consellería de Medio Rural mantéñeno como controlado. Cinco días despois de iniciado o incendio, brigadas de bombeiros forestais traballan aínda na zona afectada para acabar de arrefriar o terreo e acabar co risco de posibles rebrotes.
465 hectáreas
A Consellería de Medio Rural mantén tamén en 465 hectáreas a estimación de superficie forestal calcinada por este incendio. Dese total de terreo queimado, 255 corresponden a superficie arboredo e as 210 restantes a monte baixo. No seu percorrido sen control polas parroquias monfortinas de Baamorto, Seoane, San Xoán e San Xulián de Tor e A Vide, e polas de Toldaos e Mañente, no municipio de Pantón, o incendio afectou tanto a plantacións de piñeiros privadas e comunais como a manchas de arboledo autóctono, así como a terras de cultivo, moitas delas situadas nas proximidades das casas. Na vila de A Vide, as chamas prenderon nas ruínas dunha casa, en varios alpendres, en patios de vivendas e no tellado dunha casa.