Provocan un incendio dobre en Monforte preto da zona queimada a semana pasada

Co gran incendio que empezou en Seoane aínda quente, este luns volveron saltar as alarmas en Monforte. Pasaban as sete da tarde cando se declaraban dous incendios na parroquia de Moreda. Unha hora despois empezaba outro na de Bascós. Os servizos de extinción reaccionaron rápido e atalláronos en pouco tempo. No caso de Moreda, investigadores da Consellería de Medio Rural e a Policía Nacional revisaban o terreo para tratar de atopar indicios que demostren que foi provocado, como aseguran os veciños.

Os dous incendios de Moreda empezaron de forma practicamente simultánea e os dous ao lado da estrada LU-617, a vía de comunicación principal entre Monforte e Escairón antes do corredor, e unha das que o pasado xoves foron cortadas polo incendio. Onte foi preciso cortala de novo durante preto dunha hora, porque o fume dificultou nalgúns momentos a circulación e pola presenza na calzada de camións cisterna do servizo de extinción de incendios.

O primeiro dos dous focos de lume que este luns se declararon en Moreda empezou pouco despois da fonte situada preto das casas do barrio do Eivedo. O segundo empezou moi pouco despois ao final das curvas que soben cara a Tuiriz, xa moi preto do límite con esta parroquia do veciño municipio de Pantón. Os veciños que acudiron a tratar de controlar as chamas antes de que chegasen os bombeiros están convencidos de que os dous incendios os provocou alguén que subía en coche por esa estrada. Esta zona está tamén ao noroeste do centro urbano de Monforte, como a do incendio do xoves, e atópase á poucos quilómetros da zona calcinada polo lume fai cinco días.

Unha vez dada a voz de alarma, ao lugar acudiron en pouco tempo varias brigadas forestais, unha delas trasladada en helicóptero desde a base do monte Marroxo, e tamén os bombeiros do parque contraincendios de Monforte, varias patrullas da Policía Nacional, a Policía Local e a Garda Civil de tráfico. Mentres as forzas de seguridade cortaban a estrada ao comezo e ao final do tramo de subida, os bombeiros apagaban o lume.

As chamas non queimaron unha gran superficie de terreo, pero no caso do foco de arriba si entraron no recinto da casa situada xusto amais da última das curvas da subida. Os bombeiros tiveron que meterse no patio para impedir que o lume destruíse a construción, pero non puideron evitar que ardese a horta e todo o terreo circundante.

A última hora da tarde, un axente ambiental da brigada de investigación de incendios forestais da Xunta inspeccionaba o lugar no que os veciños que estaban preto viron que empezaba o lume. Igual que no caso do foco próximo ao Eivedo, as chamas empezaron xunto á estrada. Igual que ocorreu o xoves pasado co incendio de Seoane, a última hora da tarde de onte tamén había vento, o que axudou a que o lume prendese con facilidade, a pesar de que a esas horas en Monforte as temperaturas só superaban por pouco os vinte graos.

Cando as brigadas forestais e os bombeiros de Monforte aínda traballaban sobre o terreo para apagar os últimos restos do lume, saltou outra alarma de incendio na parroquia de Seoane. Coa axuda de dous helicópteros, as brigadas forestais controlárono con rapidez e finalmente queimou menos dunha hectárea.

---

---

---