Podemos fracasa no seu intento de reactivar os seus círculos en Galicia

Foi un dos argumentos da campaña coa que Antón Gómez-Reino presentouse ás primarias nas que se fixo coa secretaría xeral de Podemos Galicia. O obxectivo principal era reactivas os círculos, xa que o deputado que se enfrontou a Carolina Bescansa acusaba á súa predecesora, Carmen Santos, de ter abandonado ás bases e despreocuparse pola mobilización social que está no ADN de Podemos. Por iso tamén a dirección autonómica entrante puxo en marcha un novo proceso electoral interno para recuperar a figura dos secretarios locais nos concellos nos que a formación morada ten máis presenza. Foron elixidos en 25 localidades que coinciden, máis ou menos, cos lugares nos que Podemos segue tendo círculos activos; é dicir, grupos de inscritos que se reúnen regularmente para opinar, debater e acordar cuestións referentes á actualidade política.

Oficialmente hai 25 círculos. Son os que figuran no mapa da web de Podemos e están localizados en Oleiros, A Coruña, Arteixo, Santiago, Arzúa, Teo, Viveiro, Foz, Lalín, Chantada, Ribeira, Vilanova, Vilagarcía, Sanxenxo, Pontevedra, Lugo, Monforte, Vigo centro, Vigo oeste, Baiona, Gondomar, O Barco, Ribeira Sacra, Ourense e O Carballiño. Pero os datos non están do todo actualizados, porque nalgúns deles o certo é que non hai actividade na actualidade, mentres que outros como o de Ames, que si permanece activo, non figura na listaxe. Houbo algúns que estaban en hibernación e que se reactivaron por mor das próximas convocatorias electorais, como os de Ordes, Cangas, Ribadavia ou Carballo, pero o certo é que na maioría dos casos esa actividade circunscríbese ás redes sociais e non ás reunións físicas dos seus membros, que é a esencia dos círculos.

No 2014 había un centenar de círculos activos en Galicia que un ano despois quedaron na metade e que agora sobreviven só naquelas cidades e vilas nas que Podemos ten máis forza, cunha estrutura orgánica consolidada.

O obxectivo de recuperar os círculos fracasou. En parte, ten que ver coa convocatoria das eleccións xerais, que ten aos dirixentes de Podemos máis ocupados en pór en marcha a campaña electoral na que o seu propio secretario xeral, Gómez-Reino, xógase a súa permanencia no Congreso, que en xerar unha estrutura local pensada para as municipais. Pero débese tamén a que os momentos son outros e a que aquela efervescencia social hai tempo que se desinflou.

Podemos prevé presentar candidaturas ás municipais no medio centenar de municipios. O divorcio dos seus socios nacionalistas obrigaralle a facelo en solitario, e dificilmente logrará elaborar candidaturas sen redes de apoio no ámbito local.

---

---

---