A vítima foi trasladada ao hospital universitaria, onde quedou ingresado na uci
16 feb 2019 . Actualizado ás 10:51 h.Un home de 65 anos resultou ferido de gravidade nun atropelo que se produciu pouco antes das oito da tarde de onte na rúa Chantada de Monforte. Segundo a Policía Local, a vítima sufriu un impacto na cabeza que lle causou feridas e perdía sangue tamén polo nariz. Tras o suceso foi trasladado ao hospital comarcal, pero en vista da gravidade das feridas foi trasladado despois ao hospital universitario Lucus Augusti da capital da provincia, onde foi ingresado na unidade de coidados intensivos. A Policía Local realiza investigacións para determinar se o home estaba cruzando un paso de peóns de elevado que se atopa na zona onde se produciu o accidente, entre a gasolineira das Fontes e a rotonda do hórreo. O peón foi acadado por un vehículo cando trataba de cruzar a calzada, nunha zona na que a iluminación é bastante deficiente.
Na mesma rúa houbo outros dous atropelos en datas recentes. No último, o 28 de febreiro, un home resultou ferido leve. O 4 de xaneiro, unha muller sufriu graves feridas que acabaron por causarlle a morte.
Doutra banda, en Sarria rexistrouse cara ás sete menos cuarto da tarde do venres un accidente de tráfico que se saldou sen feridos. Un turismo que circulaba pola estrada LU-546 sufriu unha saída vía, na que o único ocupante do coche resultou ileso.
Sobre estas liñas, unha imaxe de arquivo da ambulancia que trasladou á vítima do atropelo da rúa Chantada rexistrado o pasado 4 de xaneiro.