Os especialistas non ven risco de erosión tras o incendio do Courel
FOLGOSO DO COUREL
Non haberá por agora medidas urxentes de rexeneración do chan queimado
20 jun 2021 . Actualizado ás 05:00 h.Os especialistas da Consellería de Medio Rural consideran que non hai risco de erosión no terreo afectado polo incendio da fin de semana pasada en Folgoso do Courel. En vista deste ditame, non está previsto recorrer a técnicas de urxencia para axudar a fixar o terreo. O mellor xeito de axudar a recuperar a zona afectada sería traballar para garantir que a vexetación se rexenere a longo prazo.
Técnicos do centro de investigación forestal (CIF) de Lourizán, un servizo dependente da Consellería de Medio Rural, desprazáronse este venres á zona afectada por este incendio, que empezou preto da vila de Ferreirós de Abaixo e avanzou en dirección norte ata pola marxe esquerda do río Lor ata o lugar de Ferrería Vella, xa na parroquia de Seoane. Despois de comprobar o estado do terreo en diferentes puntos, estes especialistas chegaron á conclusión de que o chan non sufriu un nivel de afectación importante. Polo tanto, non parece haber risco de erosión nin sequera en caso de choiva.
Chan con inclinación
Este tipo de revisións son necesarias sobre todo en incendios que se producen en chans con inclinación acusada. Toda a zona afectada por este incendio, que pertence na súa maioría á parroquia de Folgoso, é de montaña e presenta fortes pendentes.
Se os especialistas chegan a ter apreciado risco alto de erosión, a consellería estudaría a adopción de medidas urxentes para mellorar a capacidade de agarre do terreo. A máis habitual é a denominada mulching, que consiste na creación dunha cuberta protectora de forma artificial, mediante o uso de materiais como palla de cereais (habitualmente trigo, cebada ou centeo). Nas zonas máis accesibles, o material guíndase sobre o terreo de forma manual, pero nas máis escarpadas empréganse helicópteros para facer este traballo.
Non sería a primeira vez que a Consellería de Medio Rural recorre a esta técnica na Serra do Courel. Fíxoo no 2017 despois do incendio que se produciu a mediados de outubro na parroquia de Meiraos e que destrúo ao redor de 140 hectáreas.
Courel Vivo reclama unha brigada forestal con base permanente
Os concelleiros de Courel Vivo defenderán no próximo pleno unha moción cunha batería de propostas para mellorar a infraestrutura de prevención e actuación contra incendios forestais. Entre as medidas que propoñen está a reclamación á Xunta de que poña en marcha dúas brigadas forestais «verdes» para traballar en prevención durante todo o ano, e a asignación dunha brigada de bombeiros forestais con base permanente neste municipio.
En relación coa polémica xerada polas declaracións da alcaldesa sobre a autoría dos incendios, a Asociación de Desenvolvemento Rural Serra do Courel critica que Lola Castro «poña ás xentes que seguen apostando pola gandeiría e a apicultura na categoría de potenciais incendiarios». Do lume, apuntan, non hai máis responsable que quen o provoca.
O balance definitivo: 185 hectáreas carbonizadas, 40 delas con árbores
O da pasada fin de semana foi o terceiro incendio de dimensións significativas que se produce no municipio de Folgoso do Courel no que vai de ano. No que está a ser o peor primeiro trimestre de incendios en moito tempo, este municipio viu queimarse en algo menos de dous meses e medio ao redor de cincocentas hectáreas de monte. A maioría da superficie carbonizada nestes tres lumes está na parroquia de Meiraos, unha das situadas ao norte do municipio. E o resto na de Folgoso, nunha zona que empeza ao norte da capitalidade municipal e remata xa preto de Seoane.
Os últimos datos de superficie queimada no incendio da fin de semana que facilitou a Consellería de Medio Rural eran provisionais e apuntaban a ao redor de 160 hectáreas. Estimacións efectuadas por especialistas dos ciclos de xestión forestal do centro de formación profesional de Almázcara, no municipio berciano de Congosto, apuntaban que en realidade o número de hectáreas afectadas roldaba as 180. O cálculo definitivo feito público agora pola Consellería de Medio Rural dálles a razón. Segundo estes novos datos, no incendio que empezou o pasado día 12 en Folgoso arderon 185 hectáreas, das cales 145 corresponden a monte baixo e 40 son terreo arboledo.
Co balance definitivo deste incendio xa concluído, a cifra de superficie queimada nos tres grandes lumes desta primeira metade do 2021 ascende a 495 hectáreas. O primeiro destes tres incendios forestais produciuse o 30 de marzo en Meiraos, e destruíu 30 hectáreas. O segundo foi o 1 de abril, nesa mesma parroquia, e afectou a 280 hectáreas.