O festival CourelSon 2019 celebrarase en agosto en catro escenaros diferentes
17 jul 2019 . Actualizado ás 12:25 h.Poucos municipios galegos quedan sen o seu propio festival nos meses de verán, e o de Folgoso do Courel non ía ser menos. A asociación Serra do Courel organiza o segundo CourelSon 2019 co apoio do grupo de desenvolvemento rural Ribeira Sacra.Courel, a Deputación de Lugo e o Concello. Con escenarios en distintas paraxes da zona, traerá a importantes artistas do panorama do jazz e o blues español.
En lugar de estar concentrados todos os concertos nuns días concretos, levarán a cabo os venres do mes de agosto. Contará coas actuacións de Félix Slim (2 de agosto en Folgoso), Alejandro Vargas Trío (9 de Agosto en Paderne), Edu Manazas e Whiskey Tren (16 de agosto en Seceda), Rafa Fernández Cuarteto (23 de agosto en Parada) e, para rematar, José Luis Pardo e The Mollo Workers (30 de agosto en Seoane).
Ademais este ano planificáronse unha rutas temáticas coa finalidade de dar a coñecer a riqueza etnográfica, xeográfica e ecolóxica do Courel. Isto será en colaboración da fundación Ouso Pardo, a Asociación Galega de Custodia do Territorio, a sociedade micolóxica Lucus e do geoparque mundial Montañas do Courel. As rutas son gratuítas, o único requisito para apuntarse é ter a camiseta oficial do CourelSon 2019.