A tradicional proba de subida no municipio lucense será esta fin de semana
30 jul 2021 . Actualizado ás 05:00 h.O automobilismo nacional en Galicia non para, e se fai tres semanas era o Rali de Ourense e a pasada fin de semana o Rali Rías Baixas, esta fin de semana volve a actividade do motorsport español en Galicia. E faino nun dos templos do deporte de motor nacional, como é a Subida Automobilística a Chantada, que chega ao seu cuadraxésimo sétima edición puntuando para o máximo certame nacional, o CEM.
A proba lucense, que por proximidade é considerada polos afeccionados ourensáns unha cita máis dos calendarios locais, conta cunha excelente lista de participantes grazas ao regreso das espectaculares barquetas montañeiras. Entre elas a do ourensán César Rodrigúez, que co seu Osella PA21JRB é un dos pilotos chamados a estar en postos de cabeza. Non o terá doado o de Celanova Motor, pois nomes como Javi Villa (BRC BR53), Gonzalo Cabanas González-Capalleja (Norma M20B), Raúl Ferré (Silver Car CS) ou Joseba Iraola (Nova M20FC) entre outros, son claros candidatos a ser os máis rápidos no precioso trazado da ribeira chantadina.
Ademais de César Rodríguez, en Chantada -que conta cunha espectacular lista de 75 vehículos inscritos cargada de calidade- estarán outros ourensáns habituais das citas de montaña. O verinés Simón Martínez, co seu Seat León Supercopa será un dos animadores en turismos, mentres o de Luintra Juan Manuel Carballo utilizará o seu Fiat 131 Abarth. Eliseo Cardoso (Peugeot 206 XS) tampouco se perderá a cita veciña no apartado nacional.
E no referente ao autonómico, o denominado «Trofeo Patacas Fritas Jalys», un cabeza de lista ben coñecido por todos: o ourensán Pablo Rey co seu monopraza Formula SMB X21, seguido doutros pilotos de Celanova Motor como son Abraham Vázquez, cun Formula Outeda, e Jorge Fernández Vilarchao, cun Forwin TC4F. No trofeo autonómico tamén estará o Ford Escort MK1 de Javier Carballo. Unha excelente carreira pois, para gozar ao longo de sábado e domingo, a poucos quilómetros da cidade e cunha excelente participación de pilotos ourensáns competindo cos mellores de España da modalidade. Ademais, nun marco incomparable como é a Ribeira Sacra.