A cobertura esténdese desde esta semana a 566 novas vivendas e negocios na capitalidade e as parroquias
13 ago 2020 . Actualizado ás 12:52 h.Telefónica levou a cabo unha ampliación da cobertura da fibra óptica en Bóveda . A empresa de telecomunicacións comunicou este xoves a conexión de 566 novas vivendas e locais a esta tecnoloxía, da que xa gozaban anteriormente 289 fogares do municipio. Con este aumento, o 72% de poboación de Bóveda conta coa cobertura de fibra óptica de Movistar. Segundo destaca a operadora, entre outras vantaxes, ofrece unha maior calidade da voz nas chamadas e un acceso a Internet coa máxima velocidade.
As novas unidades inmobiliarias que Movistar sumou á conexión na última xornada de instalacións atópanse nos núcleos de poboación de Bóveda, Casanova, Freituxe, Guntín, Mazaira, Mosteiro, Pacio do Río, Rubián, Martín, Ver, Rivas Pequenas e Vilalpape.
A maiores, a empresa tamén dotou de cobertura ao parque empresarial de Bóveda. O proxecto e os emprazamentos foron previamente comunicados desde Telefónica ao alcalde do municipio, José Manuel Arias.
Javier Zorrilla, director do territorio norte da empresa en España, destaca que a chegada desta infraestrutura de telecomunicacións «contribuirá ao benestar dos cidadáns e ao desenvolvemento do municipio».
Do mesmo xeito, Zorrilla agradece ao Concello de Bóveda a súa «colaboración e predisposición á hora de conceder os permisos necesarios para o despregamento da rede». O director para a zona norte subliña, por outra banda, a importancia da conexión a Internet na situación sanitaria actual, que segundo as súas palabras «hase demostrado fundamental durante a crise do Covid-19».
Telefónica ten previsto para a provincia de Lugo, no período deste ano, a entrada en cobertura doutras 16.875 unidades inmobiliarias, as cales tamén pertencen a núcleos dispersos e contan con dificultades orográficas á hora de facer chegar a conexión á rede.
Unha vez cumprida esa parte do proxecto, aumentará en case un 20% o total de poboación da provincia lucense que contará coa fibra óptica do plan promovido pola multinacional de telecomunicacións española.