«O inverno na Ribeira Sacra merece a pena, aínda que faga frío»

Hai anos era imposible atopar praza para facer percorridos turísticos polos ríos da Ribeira Sacra no inverno. E non pola alta demanda, senón por todo o contrario, Non había demanda suficiente e nos meses máis fríos do ano todo estaba pechado. Hoxe xa non é tan así. «O inverno na Ribeira Sacra merece a pena, aínda que faga frío», asegura Luisa Rubines, propietaria dunha empresa de percorridos polo río Miño. Ela non parou de traballar ata agora, que vai pechar un mes para volver empezar en marzo. Pecha un mes, pero antes pechaba catro. No sector constatan que a demanda leva xa uns anos crecendo no inverno.

A Deputación de Lugo foi a primeira en probar sorte coas rutas fluviais na Ribeira Sacra. O organismo provincial lucense compraba en 1993 dous dos catamaráns utilizados o ano anterior no recinto da Expo de Sevilla e ese verán puña un no encoro de Belesar, no Miño; e o outro no de Santo Estevo, no Sil. Trinta anos despois, a Ribeira Sacra fíxose un nome como destino turístico e as rutas fluviais son probablemente o seu principal recurso. Se a mediados dos anos 90 os turistas só se podían subir aos barcos da Deputación de Lugo, agora hai oito empresas e organismos públicos con percorridos e embarcacións propias, catro no Sil e catro no Miño.

Catamarán na Ribeira Sacra: «Podemos ter ata setecentas chamadas diarias»

C. Andaluz

As oito pechaban durante meses no inverno, pero o tempo de inactividade é cada vez máis reducido. Esta primeira semana de febreiro é a que menos posibilidades vai haber en todo o ano de facer un percorrido en barco pola Ribeira Sacra, pero mesmo estes días, os de menos movemento da tempada máis baixa de todas, é posible gozar das paisaxes deste territorio desde a auga. A empresa Hemisferios mantén aberta a súa ruta, que percorre o canón do Sil con embarque na beira ourensá do encoro de Santo Estevo. Neste momento é a única, pero pronto haberá máis.

Nunha data de febreiro aínda por determinar volverá percorrer o canón do Sil o barco da adega Algueira, que está no municipio lucense de Sober, pero embarca aos seus viaxeiros en Abeleda, no lado de Ourense. Se non saben exactamente que día volverán estar operativos é porque están a agardar que lles entreguen un novo barco, con máis capacidade (30 prazas fronte ás 12 do antigo) e con posibilidade de navegar con motor eléctrico. Se amplían o barco é porque a demanda non deixa de crecer.

Ata agora traballaban ata a ponte de decembro e despois paraban, pero a partir de agora é posible que só pechen en xaneiro. «A nosa intención non é facer só tempadas altas -explica Ana Pérez Somoza, da adega Algueira-, senón mantelo case todo o ano, porque nos parece que hai demanda para iso».

Tamén volverá en febreiro Turismo Pantón, unha das empresas que ofrece percorridos no Miño polo encoro dos Peares. Eles son dos que menos pairan. Este ano por primeira vez só van estar inactivos unha semana, esta que empeza hoxe.

Xaneiro tivérono case en branco pola choiva, pero Juan Míllara, o propietario do negocio, asegura notar que crece o interese por visitar a Ribeira Sacra tamén no inverno. «Non é un volume de xente moi grande, pero empézase a notar», asegura. Eles pechaban ata agora a principios de novembro para non reabrir ata marzo, pero este ano non quixeron parar ata agora.

---

---

---