O 4 de febreiro arrincará un ciclo de veladas literarias que inaugurará a escritora Antía Yáñez
20 ene 2023 . Actualizado ás 11:22 h.A escritora Antía Yáñez abrirá o 4 de febreiro en Monforte un ciclo de veladas literarias organizado pola librería Agrasar dentro das actividades que prepara para este ano con motivo do 25 aniversario da súa apertura. O programa denomínase «Tomando un libro con...» e o seu obxectivo —segundo explican os organizadores— é ofrecer «un plan alternativo para as noites dos sábados no que lectores e autores poidan atoparse e intercambiar opinións tomando algo en diferentes establecementos».
A primeira xornada do ciclo organizarase en colaboración coa vinoteca Grolo, onde terá lugar o encontro a partir das 20.15 horas. A velada virará en torno ao libro de Antía Yáñez Non penses nun elefante rosa, que se publicou no 2022 en galego e castelán. Aos asistentes ofreceráselles unha consumición con viños da denominación Ribeira Sacra, cervexa, refrescos ou auga —a elixir—, ademais de «un piscolabis e unha conversación agradable». A entrada ten un prezo de 29 euros por persoa, que comprende un exemplar do libro e as consumicións. Tamén se ofrece a posibilidade de asistir ao encontro sen adquirir o libro. Neste caso o prezo é de doce euros. As entradas pódense reservar na librería, a través das súas contas nas redes sociais ou chamando ao teléfono 982 404 542.
Segundo explica Jacobo Rodríguez, responsable da librería, estes encontros literarios organizaranse aproximadamente cada mes ou cada mes e medio. «Parécenos unha actividade interesante para relacionarse coa xente, descubrir novos xéneros literarios e coñecer autores e establecementos que noutras circunstancias a xente non lería ou visitaría», agrega.