O candidato a secretario xeral lucense di que o proceso de primarias «está superado» tras o acordo acadado con Xosé María Arias
25 ene 2022 . Actualizado ás 12:17 h.O candidato a secretario xeral do PSOE lucense, José Tomei, anunciou a celebración dun congreso provincial do partido para o 20 de febreiro. Tras o acordo acadado o pasado día 17 co outro candidato que se postulou para dirixir esta formación —Xosé María Arias, alcalde de Castroverde—, Tomei considera que «o proceso de primarias está superado» e que agora é preciso organizar un congreso «para ser útiles aos cidadáns da provincia de Lugo e para apoiar aos alcaldes e voceiros nos distintos concellos».
Segundo o mencionado compromiso, o alcalde de Monforte e presidente da Deputación ocupará a secretaría xeral e Arias farase cargo da vicesecretaría. O acordo para formar unha candidatura única fai innecesario rematar o proceso de primarias cunha votación para elixir á nova executiva provincial e, segundo afirmaron no seu momento os portavoces do partido, responde á sensibilidade maioritaria dos afiliados.