As choivas retardaron a recollida da uva nas xornadas posteriores á apertura da campaña
19 sep 2021 . Actualizado ás 05:00 h.O consello regulador de Ribeira Sacra autorizou o mércores 15 de setembro o comezo da vendima no conxunto da denominación de orixe. As intensas choivas que caeron na madrugada dese día obrigaron a moitos viticultores a postergar a recolección, xa que nesas condicións o grao alcohólico da uva retrocede temporalmente. O tempo deu un respiro o xoves e o venres de mañá, pero durante a tarde desa última xornada as choivas volveron descargar con abundancia.
Sobre o papel, e con precipitacións tan elevadas, o ideal é agardar a que cheguen tres ou catro días de sol para que a uva recobre o contido en azucres previo aos chuvieiros. Pero a viticultura «familiar» característica nesta denominación de orixe imponse, e é a fin de semana cando hai maior dispoñibilidade de man de obra. Cabe agardar, por iso, que a xornada do domingo se peche xa cun volume significativo de uva recollida.
Os últimos datos divulgados polo consello regulador son do 12 de setembro, cando aínda era preciso solicitar autorización previa para efectuar a vendima. Ese día habíanse colleitado pouco máis de 68.000 quilos, a metade da variedade branca godello. As últimas choivas acenderon a alarma entre os colleiteiros polo risco de podremia, pero a vendima non se xeneralizará ata que as grandes adegas autoricen a entrada da uva tinta nos seus depósitos.