Monforte abre o xoves unha oficina de xestión para calquera trámite sobre a pandemia

A Consellería de Sanidade abrirá esta semana en Monforte  un punto de xestión administrativa no que será posible xestionar calquera asunto administrativo relacionado coa pandemia, as vacinas e os seus certificados. Estará na estación de autobuses e prestará servizo para todos os municipios que forman parte do distrito sanitario de Monforte, que inclúe as comarcas de Lemos e Quiroga e a maior parte da de Chantada.

A apertura deste punto de xestión administrativa foi anunciado pola consellería a semana pasada, pero ata agora non se sabía nin o día de apertura nin o lugar no que se situaría este novo servizo. Portavoces de Sanidade confirmaron este martes que estará en dependencias da estación de autobuses de Monforte e que empezará a funcionar este xoves.

O director asistencial do Sergas para a provincia de Lugo, Rafael Monte, explica que neste novo servizo será posible facer calquera xestión administrativa relacionada coa pandemia de covid-19 , como «a impresión de probas diagnósticas e de enfermidade, ou a activación da Chave 165, o perfil dixital que permite realizar todo tipo de trámites clínicos a través de Internet». Tamén será posible tramitar neste lugar unha alta rápida no servizo sanitario público de Galicia para persoas que estean temporalmente aquí pero teñen a súa residencia habitual noutros lugares.

Sanidade abriu xa esta semana en Lugo e en Burela outros dous puntos de xestión administrativa similares a leste de Monforte. O de Lugo está na xefatura provincial de Sanidade e o de Burela na Casa do Mar. Os tres permanecerán abertos de luns a sábado e en horario de nove da mañá a dúas da tarde.

Na estación de autobuses

O punto de xestión administrativa de Monforte atópase na estación de autobuses da rúa San Pedro, xusto en fronte do centro de vacinación contra o coronavirus habilitado nun edificio anexo ao instituto Río Cabe.

---

---

---