Novos casos en Taboada e Folgoso reducen o número de municipios libres de covid no sur de Lugo
LEMOS
A zona despide o estado de alarma cun lixeiro repunte nos contagios
10 may 2021 . Actualizado ás 19:11 h.O adeus ao estado de alarma coincide cun lixeiro repunte de contagios de coronavirus no sur de Lugo. Se a primeira semana de maio remataba con nove dos trece municipios desta zona libres de virus, a segunda empeza con novos casos en municipios que levaban tempo sen rexistrar ningún. No Hospital Público de Monforte hai tres pacientes ingresados na planta covid.
Os datos do mapa de incidencia do covid-19 por municipios indican este luns que nos últimos sete días detectáronse positivos en Chantada , Taboada, Carballedo, Pantón e Folgoso do Courel. No caso de Folgoso do Courel, o propio Concello informaba á primeira hora do luns nas súas redes sociais de que se trata dun único paciente, que xa está illado na súa casa para gardar corentena e que Sanidade está a facerlle probas aos seus contactos próximos para comprobar se hai máis positivos ligados a el.
Folgoso do Courel e Taboada contábanse o venres entre os municipios que levaban máis de dúas semanas sen contagios novos. Con estes cambios, no sur de Lugo hai agora novos casos de coronavirus en seis municipios (Chantada, Monforte, Taboada, Carballedo, Pantón e Folgoso do Courel) e seguen libres de virus outros sete (Bóveda, A Pobra do Brollón, O Saviñao, Sober, Quiroga, Ribas de Sil e O Incio).
De todos os xeitos, o número de contagios é pequeno en todos, menos en Chantada . Neste municipio, os datos deste luns reflicten a existencia de 28 positivos confirmados nos últimos 14 días. A última hora da mañá saberase se o brote que se rexistra na residencia de maiores de DomusVi segue sumando 13 positivos ou incorpora algún novo.
Sen aglomeracións nocturnas tras o fin do toque de queda
No que respecta a Monforte, a situación clínica segue sendo relativamente tranquila. Nos últimos sete días non se detectou nesta localidade ningún caso novo. Tampouco hai constancia de que se produciron aglomeracións nocturnas esta fin de semana a causa do levantamento o sábado do estado de alarma. As terrazas do centro, a Compaña e a Estación si estiveron moi concorridas toda a fin de semana e a maioría dos restaurantes recuperaron o sábado o horario de ceas con bo movemento de clientes.