O establecemento abrirá a fins do verán, segundo prevén os responsables
15 abr 2021 . Actualizado ás 13:40 h.O primeiro hotel da comarca de Quiroga non puido iniciar a súa actividade a pasada Semana Santa, que era a data de apertura que barallaban os seus responsables cando empezou a súa construción, a principios do ano pasado. As obras sufriron un importante atraso debido ás dificultades financeiras que causou a crise sanitaria ao grupo empresarial Socratea, promotor deste proxecto. Pero os traballos seguen adiante e agora preténdese abrir o novo establecemento cara a finais do verán.
Segundo explica o xerente de Socratea, Juan Luis Vázquez, o grupo empresarial sufriu unha drástica caída na súa facturación desde os inicios da pandemia a causa do peche dos establecementos que xestiona -o albergue turístico municipal de Quiroga e o centro de inmersión lingüística dos Peares-, así como da paralización dos servizos de cociña que leva en varios campamentos e albergues repartidos pos diversas localidades galegas. «A nosa facturación foi de preto de dous millóns de euros no 2019, no 2020 baixou a uns 400.000 euros e no 2021 leva o mesmo camiño, porque a nova temporada está perdida», explica.
O proxecto do hotel, sinala así mesmo Vázquez, puido seguir en marcha grazas ao apoio bancario que conseguiu o grupo. A pesar das dificultades e aos atrasos, agrega o xerente, as obras están agora considerablemente avanzadas. «O que falta por construír é unha terraza, que non é unha gran obra», precisa. Cando rematen os traballos, agrega, empezará o proceso de obtención dunha licenza de actividade e outros trámites administrativos, así como da selección e contratación do persoal que atenderá o establecemento.
Doutra banda, Juan Luis Vázquez sinala que cando o hotel comece a funcionar ofrecerá servizo de aloxamento e cafetería. O proxecto comprende ademais a apertura dun restaurante, pero a posta en marcha deste servizo quedará para unha segunda fase.
Un edificio histórico
O novo hotel ocupará un inmoble construído na década de 1930, situado na rúa Real de Quiroga e coñecido tradicionalmente como Casa do Estanco. O establecemento hostaleiro levará tamén este nome. Nas obras iniciadas o ano pasado abriuse un novo espazo no subsolo do edificio -á vez que se renovaba e reforzábase a súa cimentación- co fin de incrementar o seu espazo útil. O establecemento contará con nove cuartos e unha capacidade de entre vinte e vinte e dúas persoas. «Nun principio as habitacións ían ser máis pequenas, pero despois decidimos amplialas e reducir o número de prazas, porque preferimos primar a calidade sobre a capacidade», apunta Vázquez.