O consello regulador pon en marcha unha campaña de promoción que comprenderá catas virtuais e un concurso fotográfico, entre outras iniciativas
02 dic 2020 . Actualizado ás 18:34 h.O consello regulador de Ribeira Sacra puxo en marcha unha campaña para incentivar durante o período do Nadal o consumo dos viños da denominación de orixe que comprenderá varias actuacións. A iniciativa foi presentada por José Manuel Rodríguez e Víctor Manuel Rodríguez, respectivamente presidente consello regulador e responsable da comisión de promoción desta entidade. Unha estas accións consistirá nunha serie de catas comentadas virtuais de viños desta denominación que correrán a cargo da catadora Mercedes González que se ofrecerán en tempo real a través de diversas redes sociais entre os próximos días 10 e 17, a partir das 19.00 horas.
Doutra banda, o consello regulador convocou un concurso de fotografía ao que se poderán presentar imaxes ata o día 15. Nas fotos debe figurar unha botella dalgún viño da denominación xunto co acompañamento gastronómico que prefiran os autores. As imaxes téñense enviar por Whatsapp ao número 647 595 747 e publicaranse no perfil de Facebook da denominación de orixe. Os autores das fotos que obteñan máis me gusta» serán premiados con aloxamentos dunha noite en establecementos de hostalería, comidas en restaurantes e visitas guiadas a adegas. A campaña promocional comprende por outra banda un brinde de felicitación das adegas de Ribeira Sacra que será gravado en vídeo e transmitido por Internet. A iniciativa incluirá así mesmo unha campaña de promoción publicitaria dos viños da denominación que levará a cabo a través de diversos medios de comunicación.
José Manuel Rodríguez sinalou por outra banda que a comercialización dos viños de Ribeira Sacra funcionou «razoablemente ben» durante este ano a pesar dos problemas causados pola crise sanitaria. «En conxunto, as vendas baixaron un 30% con respecto ao que se consideraría un ano normal, unhas cifras que corresponden aproximadamente coas que se rexistraron no ano 2014», explicou a este respecto. A baixada xeral -engadiu- foi paliada polo incremento nas exportacións que tiveron algunhas adegas e polo aumento nas vendas que tiveron numerosas empresas do sector nos establecementos de alimentación. «Aínda que se fala moito da importancia que ten a hostalería para que as adegas dean saída aos seus produtos, puido verse que o sector da alimentación tamén ten moito peso», comentou Rodríguez, quen apuntou tamén que os prezos de venda dos viños da denominación mantivéronse estables.
Premios de Aosta
Por outra banda, os responsables do consello regulador anunciaron que o día 18 celebrarase a tradicional entrega dos premios conseguidos polas adegas da denominación no certame internacional de viños de montaña da rexión italiana de Aosta. O acto celebrarase á unha da tarde.