As débedas municipais de máis de cen euros poderán optar ao pagamento fraccionado
LEMOS
Tomei avanza que no 2021 non haberá subida de taxas nin revisión do IPC
19 oct 2020 . Actualizado ás 20:24 h.«Por sexto ano consecutivo, non haberá subida de impostos municipais en Monforte», avanza o alcalde, José Tomei. A aprobación das ordenanzas fiscais do 2021, paso previo á presentación do orzamento, quedará resolta no pleno que celebrará a corporación local o vindeiro luns. Acompañado polos concelleiros Gloria Prada -responsable de Facenda- e José Luis Losada, Tomei deu a coñecer os detalles relativos ao cobro das diferentes taxas municipais. Entre as novidades, rebáixase a cen euros o importe das débedas para as que será posible recorrer ao pagamento fraccionado.
Ata a data, esta opción só era factible para débedas cun importe de polo menos 300 euros. As ordenanzas fiscais do 2021, con todo, permitirán fraccionar en doce mensualidades os pagamentos de entre cen e douscentos euros. Se o importe sitúase entre 200 e 300 euros, o pagamento poderase efectuar en dezaoito mensualidades. A marxe de cobro amplíase a vinte e catro meses, o máximo autorizado, se a débeda co Concello pasa os trescentos euros.
«Os monfortinos acabaron pagando menos en 2020 que en 2015. Neste mandato seguimos na mesma liña de traballo, conxelando as taxas e os impostos para o ano 2021, sendo ademais especialmente sensibles coa difícil situación pola que todos estamos a atravesar», dixo o alcalde , en referencia ao impacto económico da crise sanitaria.
En detalle, o equipo de goberno mantén nas ordenanzas fiscais do 2021 a redución do 50% que se puxo en práctica este ano nas taxas do cemiterio municipal en concepto de sepulturas e transmisións. No relativo ao cemiterio, a ordenanza revísase para que as concesións administrativas pasen a realizarse por enumeración correlativa. Este cambio facilitará, sempre que sexa posible, que o Concello poida outorgar novas concesións de sepulturas en espazos lindeiros aos propietarios de nichos.
Tamén seguen vixentes, por outra banda, as bonificacións sobre o imposto de construcións, o IAE e o IBI para favorecer a implantación de empresas e a creación de novos postos de traballo.
Cómputo negativo
Segundo a información que adiantou Tomei sobre as ordenanzas fiscais, nin sequera suporán a actualización do IPC nos contratos de servizos municipais que están suxeitos a ela. «Dado que no presente ano, en cómputo interanual de setembro de 2019 a agosto de 2002 o IPC é negativo nun 0,5%, non haberá revisión», explica o alcalde. Non subirán, polo tanto, nin os prezos da piscina nin os recibos de auga e recollida de lixo.
Respecto ao imposto de obras, as bonificacións pola declaración de especial interese poderán presentarse entre a solicitude de licenza e a finalización do prazo para efectuar a liquidación provisional, co que se amplían os prazos. As bonificacións do IBI, doutra banda, deberán formularse a partir do próximo ano antes do 30 de xuño de cada exercicio.