Os últimos datos do consello regulador confirman que a campaña se pechará á baixa en Ribeira Sacra
26 sep 2020 . Actualizado ás 11:48 h.Ribeira Sacra encara a recta final da vendima con tres millóns e medio de quilos de uva que xa entraron a estas alturas nas 93 adegas inscritas na denominación de orixe. Con data de este venres, 58 delas deran por pechada a campaña vitícola. As outras 35 seguen inmersas na recollida na antesala da última fin de semana de setembro. Será o segundo desde que, o pasado día 16, autorizouse o comezo da vendima de forma xeneralizada.
Os últimos datos divulgados polo consello regulador poñen de novo de relevo o peso da mencía no conxunto da produción. Desta variedade cultiváronse por agora 2.809.318 quilos, o que supón un 85% do total colleitado. Entre as tintas figuran a continuación, en canto a volume de colleita, a garnacha (82.783 quilos) e o merenzao (51.022). Respecto das variedades brancas, recolléronse ata a data 453.516 quilos, dos que 338.708 son de godello .
A evolución da vendima confirma, apunta o consello regulador, «a prevista diminución da colleita nesta campaña». Segundo sinala, como contrapartida a esa menor produción, a uva presenta «un estado sanitario óptimo». Os traballos de vendima séguense desenvolvendo, por outra banda, «con todas as medidas necesarias para a prevención do covid-19».