En plena tempada alta, a conexión continúa cancelada
08 jul 2020 . Actualizado ás 10:57 h.Fai case vinte días que empezou o verán e boa parte dos trens de longo percorrido que chegan e saen de Galicia seguen cancelados. Renfe garda silencio sobre a volta destes servizos, así que todo apunta a que este vai ser o primeiro verán sen conexión directa entre a estación de Monforte co País Vasco. A estación monfortina recuperou polo menos parte das frecuencias habituais con Barcelona, pero a de Lugo nin sequera iso. Para viaxar a Barcelona desde a capital da provincia é preciso ir primeiro a Monforte e despois buscar conexión alí.
En Renfe seguen sen aclarar se volverán todos os trens de longo percorrido que seguen suprimidos desde que en marzo estalou a urxencia sanitaria e foi declarado o estado de alarma. A empresa tampouco explica canto tardarán en recuperarse os que si volvan. Mentres tanto, o verán avanza e quen queiran viaxar entre Monforte e o País Vasco teñen que facelo por estrada ou en avión.
Ata o ano 2014, a estación de Monforte estaba conectada co País Vasco con catro trens diarios, dous en cada sentido. Aquel ano foi suprimido o que facía o percorrido de noite. O diúrno seguiu circulando con normalidade, e ata agora era un dos de longa distancia que Renfe adoitaba reforzar cando se aveciñaban picos na demanda, basicamente no verán, Semana Santa e algunha ponte festiva. Esta liña de trens de longa distancia cóntase entre as máis veteranas de Renfe e é moi utilizada pola nutrida comunidade galega no País Vasco.
Como case todos os emigrantes galegos no País Vasco, José David Fidalgo subiu a estes trens decenas de veces. Este ano non tiña previsto vir en tren ao seu Taboada natal, pero sabe ben da importancia deste servizo. Fidalgo, que foi directivo da Casa de Galicia en Bilbao, cre que as liñas de tren directas entre o País Vasco e Galicia teñen que seguir operativas. E se hai problemas económicos para sostelas, que se buscan alternativas. «Un servizo así é necesario -argumenta-. Renfe debería buscar a maneira de mantelo, non sei se adaptando o tamaño dos trens á demanda real que haxa en cada momento».
O amianto, os vagóns vellos e a volta do Talgo
O tren Galicia-País Vasco leva anos sufrindo problemas. É un dos máis afectados pola carencia de maquinistas, o que fai que sexan frecuentes os transbordos en autobús, e polas avarías. O pasado mes de febreiro, menos dun par de semanas antes que houbese que pechalo toda pola pandemia, Renfe anunciaba que substituía por talgos os trens que cubrían esta liña. Ademais de que os vagóns eran vellos, nalgúns deles aparecera amianto.
A situación é aínda peor na estación de Lugo, sen liña ademais con Barcelona
Se os servizos de longa distancia dispoñibles en Monforte non acaban de recuperarse unha vez pasada a fase do confinamento polo coronavirus, a situación na estación de Lugo é aínda peor. Desde a capital provincial hai xa anos que non hai unha conexión directa por tren co País Vasco, pero é que agora non a hai tampouco con Barcelona.
Renfe suprimiu en marzo todos os trens que circulaban entre Galicia e Barcelona e hai dúas semanas reactivou o diúrno, un Alvia que pasa por Monforte, pero non por Lugo. O tren hotel, que se ten parada na estación lucense, non volveu. Tampouco se sabe se vai volver. Os responsables de Renfe non o aclararon aínda.
O caso é que nestes momentos para viaxar en tren desde Lugo a Barcelona hai que viaxar antes a Monforte. E hai que facelo á primeira hora, porque o Alvia que vén de Vigo ten a súa saída en Monforte ás 9.58 da mañá.
Previsións habituais de vendas de 20.000 billetes cada seis días en tempada alta
Non hai datos públicos dispoñibles sobre a ocupación media dos trens que fan o percorrido entre Galicia e o País Vasco, pero si información parciais que permiten facerse unha idea. Hai pouco máis dun ano, Renfe anunciaba o reforzo do seu servizo de longa distancia entre estas dúas comunidades autónomas. Para atender a demanda que agardaba para a ponte do primeiro de maio, a compaña sumaba 1.954 prazas extra para os seis días comprendidos entre o 30 de abril e o 5 de maio. Eran, explicaban entón fontes da empresa, máis dun 10 % por amais da capacidade habitual.
Diso dedúcese que neses seis días Renfe agardaba vender máis de 20.000 billetes nese traxecto. O verán e o Nadal son habitualmente as épocas do ano de máis demanda de billetes neste traxecto, moi utilizado por emigrantes galegos no País Vasco que volven pasar as vacacións coas súas familias.
