Unha nova empresa, Aerotours, encargarase de xestionar os paseos aéreos
14 jun 2020 . Actualizado ás 05:00 h.Unha empresa de Madrid xestionará este verán un programa de voos en globo na Ribeira Sacra. Tomará así a substitución á empresa que puxo en marcha esta proposta de lecer neste territorio fai catro anos da man do consorcio de turismo . Esta empresa pioneira dos voos en globo na Ribeira Sacra xa non ten actividade, pero o seu peche non suporá a desaparición desta proposta.
A empresa Aerotours, con oficinas en Madrid e Segovia, dedícase en exclusiva a ofrecer voos en globo en distintas paraxes, todos no centro da Península. E acaba de incorporar a Ribeira Sacra á súa nómina de puntos de despegamento. Neste territorio, a empresa ten previsto facer voos diarios entre mediados de xullo e mediados de agosto.
Na empresa están convencidos do potencial da Ribeira Sacra para este tipo de oferta turística. Coñecen a experiencia da empresa que os precedeu nesta iniciativa e saben que a demanda era moi alta. Mesmo creen que en condicións normais habería mercado para que as dúas empresas traballasen ao mesmo tempo. Polo menos coas cifras e as perspectivas de negocio do ano pasado. O ano do coronavirus todo é un pouco máis incerto, aínda que en Aerotours prefiren ver toda esta crise como unha oportunidade. «Xa pensamos na Ribeira Sacra fai un par de anos -di Anulfo González, director operativo de Aerotours-, pero parécenos que agora é o momento ideal».
En Aerotours saben que dificilmente este verán vai bater marca de visitantes, nin na Ribeira Sacra nin en ningún outro destino. «Unha crise como esta che pode deixar noqueado -engade o director de Aerotours-, pero o confinamento tamén deu tempo para pensar e retomar proxectos, e nós pensamos que é o momento de apostar, de crer en nós mesmos e nas ganas da xente de facer cousas». Con ese espírito, na empresa dan por feito que os resultados deste verán de voos na Ribeira Sacra non van ser probablemente tan bos como noutras circunstancias, pero exponllo como algo parecido a unha sementa para recoller os resultados o ano que vén.
Aerotours desprazará a cinco persoas este verán á Ribeira Sacra para atender os seus primeiros voos nesta zona. Tamén abrirá unha base provisional aquí, nun municipio aínda por determinar, a pesar de que a maioría do contacto cos seus clientes, reservas incluídas, tramítano a través da súa páxina web (www.aerotours.com).
Os voos deste verán despegarán nun principio desde paraxes de Chantada e Taboada próximos ao río Miño. Os responsables desta iniciativa teñen pensado desprazar dous globos este verán á Ribeira Sacra, un con capacidade para oito persoas e o outro para catorce. En función da demanda, utilizarán un ou o outro, ou os dous á vez.
En Aerotours queren comprobar se tamén poden usar como punto de despegamento lugares próximas ao canón do Sil, pero iso probablemente non poderá ser ata o 2021. Se as condicións son apropiadas, a empresa ten previsto desprazar persoal á Ribeira Sacra a semana que vén para realizar uns voos de prospección na contorna do canón do Sil. «O canón do Sil é máis difícil para os voos en globo que o Miño, principalmente polos ventos», explica González.