Unións Agrarias pide un plan adecuado á viticultura de segunda actividade
20 may 2020 . Actualizado ás 05:00 h.Unións Agrarias cuestiona a eficacia do plan de axudas que acaba de presentar o Ministerio de Agricultura para facer fronte ao forte impacto da crise sanitaria sobre o sector vitivinícola. Polo menos no contexto da Ribeira Sacra, apunta o sindicato, «ningunha das grandes medidas que foron anunciadas no BOE van a facilitar o relanzamento do sector do viño por falta de adecuación a súa realidade». O portavoz desta organización nas comarcas de Chantada e Monforte, Mariano López Nieves , avanza que presentarán alegacións «no sentido de que se respecte a especificidade do modelo de viticultura social da D.O. Ribeira Sacra».
Nesta denominación de orixe, as medidas excepcionais que se adoptaron como consecuencia da alarma sanitaria teñen un especial impacto nas pequenas adegas. O peche da hostalería e a restauración, e os condicionantes que marcarán a súa reapertura, afectan á principal canle de comercialización destes produtores.
«O confinamento derivado do actual de estado de alarma provocou unha caída nas vendas nas adegas, sobre todo as pequenas, polo peche do canal Horeca, o que pode dificultar o almacenamento e comercialización da produción da vindeira vendima», apuntan desde Unións Agrarias.
O que propón o sindicato é que a Xunta colabore co ministerio «para a elaboración dun plan adaptado a morfoloxía do sector do viño, no que teña unha presenza relevante a viticultura social, de segunda actividade, as pequenas adegas con edicións curtas pero con prezos altos con destino a restauración». Só así se podería concretar, segundo destaca, que parte dos 74 millóns de euros que se van repartir entre o sector corresponderanlle a Galicia e máis concretamente á Ribeira Sacra.
Solucións como a destilación ou a transformación dos excedentes de viño en vinagre, indica o sindicato agrario, só están ao alcance das grandes adegas polos mínimos que se establecen na orde ministerial. «Tampouco a vendima en verde é aplicable porque a produción de uva da D.O. Ribeira Sacra está moi axustada e resulta moi prematuro pensar nun exceso de froito para a vendima», sostén Mariano López Nieves .
Mestura de viño vello
«Respecto da mistura de colleitas ata un 30% de viño vello, como se valoraba a semana pasada desde Medio Rural, non ten fácil concreción polas limitacións da UE, que só permite chegar a un 25% e nuns casos moi específicos», afirma o representante de Unións Agrarias.
Desde o seu punto de vista, resulta imprescindible que se constitúen mesas de traballo en todas as denominacións, con participación activa de adegas e viticultores, para impulsar o sector neste difícil momento. Para iso considera imprescindible que se aceleren «os estudos de custes de produción vitivinícolas».
Unións Agrarias esixe ademais á Xunta que vincule a concesión de calquera liña de liquidez ás adegas «á que garantan a recollida da uva a prezos que cubran os custes de produción e que se obrigue a depositar os contratos de abastecemento nun rexistro público para certificar que este cumpre coa lexislación vixente».
O sindicato quere que as liñas de liquidez sexan para as adegas que compren uva